Hernaniar maiteak:

( Angel Olaran ) (...) Hona etortzen diren kazetariek ordu batzuk grabatzen dituzte eta ondoren minutu batzuetan laburbiltzen dute hemengo egoera eta gure lana. Beraiek erabakitzen dute pasatzen dena. Telebistako programa ikusi zenutenok gure umeak ikusteko aukera izan zenuten afalondorengo gau batean. Familia baten etxera iristen garenean, kasu honetan, Tsegazab, Goytom, Meseret, Tedi eta Yordanosen etxea, bizilagunak bisitara batu ziren. Or­duerdiko hizketaldiaren, gainbegiratuaren... ondoren, Yordanosek eta Fiorik giroa aldatu zuten errezitaldi batekin eta jarraian izan ziren abestiak, poemak eta dantzak. Guztia giro alai, eroso eta naturalean. (...) Bost haur hauen ama, Enkubahari, orain dela 6 urte hil zen. (...) Beraiek, beste hainbat familia umezurtz bezala, lasaitasunaren, adimenaren, batasunaren eredu dira. Zuen laguntza halako etxe askotara heltzen da, dela janari bidez, dela koaderno, botika, mini-kreditu, errenta... bidez. 1.200 umezurtzen eta ama gaixorik duten 300 umeren konfiantza izaten jarraitzen dugu. (...) Etiopiako leku ezberdinetan egon diren lagunek azaldu izan didate umeekin bizitako esperientzia izugarria dela, gizatasunez betetakoa. Eta opari hau egunero eskaintzen digute, hemen Wukron, gure haur eta gazteek, ematen ari direla jakin gabe. Beraien izenean, eta nirean, gure eskerrik beroena bidaltzen dizuet. Eta ausartzen naiz esatera, harrotasunez ikusiko zenuketeela zuen babesarekin lortzen ari garena. Jainkoak bedeinka zaitzatela.