Bosgarren kontenedorearen numeroak

( Mattin Aldaia Olasagasti Hernanin Zero Zabor taldearen izenean ) Hondakinen inguruan Her­nanin daramagun eztabaidan behin eta berriro ateratzen ari da 5. edukiontziaren kontua. Alegia, organikoa biltzeko kontainer berri bat gehiago jartzea, Atez Ateko bilketa egitearen alternatiba gisa. Iruditzen zaigu hau gerta­tzen ari dela batzuetan herritar batzuek gaia ondo ezagutzen ez dutelako (normala da, orain dela gutxi arte hondakinetaz gutxi hitz egin dugu) baina beste ba­tzuetan badagoela ahalegin bat propio ezkutatzeko 5. kontainer horren atzean dauden xehetasunak. Argitu di­tzagun puntu batzuk: 1.- Txalotzen dugu horretan parte hartzen duten familien borondatea. Atez Ateko alternatibarik ez balitz, agian guk ere hori bultzatuko genuke, ezer eza baino hobea delako. 2.- Argi esan behar da: 5. edukiontzia jarri den tokietan ez dute herritar guztiek parte hartzen. Borondatea azaldu duten familiek bota­tzen dute organikoa horietara, eta beste familia guztiek beti bezala segitzen dute. 3.- Esperientzia batzuetan 5. kontainerrak irekiak dira, familia gehiagok hartzen dute parte, baina konpostaren kalitatea asko jaisten da deskontrolagatik. Beste ba­tzuetan giltza daukate, konpost hobea lortzen dute baina familia askoz gutxiagok har­tzen dute parte. 4.- Beraz, sistema horrekin herritarren hondakin organiko gehienak segitzen du zaborrarekin nahastuta joaten eta gainera paper, ontzi eta botila asko ere bai: gai berezien beste kontainerren errendimendua ez da hobetzen. Familia boluntarioek ahalegin handia egin arren herri osoaren arazoa ez da konpontzen. 5.- Egunotan jakin da Donostian sistema ez dela zabalduko Intxaurrondora eta Amarakoa eten egin dela garestiegia omen delako eta subentzionatzeko dirurik ez dagoelako. Non daude benetako numeroak? 6.- Amaran 5. kontainerrarekin ahalegina egin duten 2.000 familiei agintariek esan diete ´mila esker zuen lanagatik eta agur ben-hur`. Beraz, agintariek ez zeukaten alternatibatzat, izatekotan ere ´esperientzia pilotoa zen`... Puntu guzti horiek kontutan hartuta, ez da erreala Hernanin 5. kontenedore ba­tzuk jartzeko posibilitatea planteatzea Atez Ateko bilketa sistemaren alternatiba bezala. Datuek garbi erakusten dute.