Urriaren 17an Usurbila goaz, Atez Atekoa ikustera

( Pello Zubiria Camino, Hernanin Zero Zabor taldearen izenean ) Datorren larunbatean, urriak 17, Hernanin Zero Zabor taldekoak Usurbila joango gara, Atsegindegitik goizeko 07:30­etan aterata. Han, goizeko 08:00etatik aurrera, Atez Ateko hondakin bilketa sistemak nola funtzionatzen duen ikusiko dugu, Usurbilgo boluntario batzuek gidatuta. Atez Atekoaren detaile asko ezagutu nahi ditugu lekuan bertan: nola egiten den bilketa, zein itxura daukaten kaleek hondakinak bildu aurretik eta ondoren, hondakinak gaika nola bil­tzen dituzten herriko jendeen etxeetan, tabernetan edo soziedadeetan eta abar. Jakin nahi dugu, era berean, Usurbilgo jendeak zein abantaila ikusten dizkion sistema honi, nola egin duen kontainerren sistematik sistema berrirako aldaketa, hobe­tzeko zer dagoen, eta mila xehetasun. Lehendik ere Usur­bil­go jendearekin hitz eginak gaude kontu hauetaz, baina orain lekuan bertan ikusi nahi dugu. Hernanin Zero Zabor taldean biltzen garenok ilusionatuta gaude Hernanin laster Atez Ateko bilketa jarriko delako martxan. Badakigu eztabaidak sortzen dituela, badakigu martxan jartzeak bere lana eskatzen duela hasieran, herritarren ohiturak egokitzea tartean, baina herriko hondakinak modu burutsuan jestionatzeko plan­teatzen diren alternatiben artean emaitzik onenak Atez Atekoak eskaintzen dituela konbentzituta gaude. Ez du zertan izanik orain arteko kontainerren sistemak baino garestiagoa eta aldi berean askoz emaitza hobeak eskaintzen ditu. Atez Ateko sistema zabalduz gero, Intzineradorarik ez da beharko eta gipuzkoar guztion osasunak –eta gure ondorengoenak- eskertuko du. Usurbilera goiz joango gara, hondakin bilketa kaxkoan goiz egiten delako. Horregatik da zita 07:30etan egitea Atsegindegin. Norbai­tek interesa baldin badu gurekin etortzeko, azaldu eta elkarrekin joango gara. Gure informazioak http://zerozabor.ning.com/ gunean daude.