Ekuazioa

( Jexux Eizagirre Portillo ) Angel Olaran herritarraren lagunek, ezin konta ahalako abesbatza osatzen dute. Baina, apenas iristen zaigu haien ahotsa: hain da zurru... murru... Gainera, ez diegu entzun nahi. Iñaki Gabilondo (1.800.000 euro, urtean) donostiarraren lagun telebisiboek, apenas osatzen dute otxote bat. Baina, beti ditugu begi aurrean, eta belarri er­tzean, betiko txapa jotzen: Merkatua da jainko! Olaranen lagunak, goseaz eli­katzen dira. Egunero, 100.000 hiltzen dira. Haiek guz­tiek izen bakarra dute: anonimoa. Gabilondoren la­gu­nak, botereaz elikatzen dira. Txit ezagunak dira: Gon­zalez, Zapatero, Botin... (beno, egiari zor, ezin esan San­tander bankuaren ´jaun eta jabea` inoren laguna denik, baina Gabilondoren jefe berria badela bai: bankuak erosi baitu Gabilon­doren enpresaren zorra). Lagun horiek ez dute gosea asetuko, baina hilerriak bai; batik bat Hirugarren Mun­duan. Zapaterok murriztu egin du Hirugarren Munduaren­tzako ´laguntza`: 918 milioi gutxiago. Gabilondoren la­gu­nek beharrezko irizten diote (Lehenik, salba ditzagun bankuak!). Olaranen la­gunek, berriz: Lehen ere na­hikoa kentzen diguzue (Hi­rugarren Munduko nekazariak kafea 60 zentimotan saltzen du, kiloko: gure munduan 26 euro egiten du kiloak). Errematea: Buenafuente-k (2.000.000 euro, urtean), telebistan, Gabilondo maisuari egin dio galde: Zein eredu jarriko zenuke, gazte jendearentzat? Galderak badu bere funtsa: Gabilondoren anai-maitea baita Hezkuntza ministroa. Eta maisuaren erantzuna: Xavi eta Iniesta futbolariak baino ereduagorik ez dut beste inor ere ikusten. Gabilondoren lagunak: poz-pozik (Zer litzateke Espainia, ´La Roja` gabe?). Olaranen lagunak, berriz ere, buru makur. Ekuazio sinple bat da arazoa. Futbolaren zorra = Etiopiaren zorra. Bata, fitxaje milionarioen erruz. Bestea, gure munduaren erruz. Nork ordainduko du bata, eta nork bestea? Ez da katedratikoa izan behar, inkognita asmatzeko.