Erremonteko IV. Sagardoaren Txapelketa hasiko da bihar. Zortzi sagardotegitako laguntza jaso dutenez, erremontista bikote bakoitzak sagardotegi bat ordezkatuko du.
Apirilaren 19ra arte
Txapelketako lehenengo partidua bihar jokatuko da, 16:00etatik aurrera Galarretan: Juanenea-San Miguel, Gaztañagaren izenean, Juaristi-Agirrezabalaren kontra (Petritegi).
Bi bikote horiez gain, B taldean beste bi daude: Urtasun-Barrenetxea IV (Oialume Zar) eta Matxin III-Etxeberria III (Gurutzeta).
A taldeko bikoteak beste lau dira: Ezkurra-Endika (Larre Gain), Urriza-Zubiri (Altzueta), Etxeberria IV-Jon (Bereziartua) eta Uterga-Olazar (Saizar).
4, 2, 1 eta 0 puntu banatzeko
Txapelketa bihar hasi eta apirilaren 19an bukatuko da. Finalerdiak, berriz, apirilaren 12an jokatuko dira: A taldeko bikote irabazlea B taldeko bigarrenaren kontra, eta B taldeko bikote irabazlea A taldeko bigarrenaren kontra.
Puntuen banaketa ere sinplea izango da oso: 40 tanto, 4 puntu, 36 tantotik gora eginez gero, 2; 32-35 tanto artean puntu bat, eta 31tik behera 0.
Aurten, gainera, porra egiteko aukera izango da.