Ez zuten zulorik aurkitzen, eta saiatu ziren arren, ordiziarrek amore eman zuten Landaren. Hernaniarrak gehiago izan ziren, bai erasoan, eta bai batez ere, defentsan. Giza pareta bat topatu zuten goierritarrek Landaren, azken metroetara iristen ere uzten ez ziena, eta kontrara, eurek utzitako zuloak aprobetxatu zituena, primeran. Hernanik partidua eta patxada irabazi zituen atzo, 24-17, eta lau puntu gehiago.
Ezustean harrapatzea...
Igor Genua kapitainak egin zuen lehendabiziko entsaioa, partidua hasi orduko, inork espero ez zuela. Ezustean harrapatu zituen denak; kolpe ederra hartu zuen berak ere, baina haundiagoa aurkariek. Perezek jaurti, eta gauzatu: 7-0. Ordizia talde haundia da, profesionala, eta segituan erreakzionatu zuen. Jo eta jo, eta bai, lortu zuten entsaioa, eta gauzaketa. Eta handik 7 minutura beste entsaioa, 7-12 eta aurretik goierritarrak. Bildurtzen hasia zen Hernaniko zaletu-jendea, minutuak aurrera, eta Ordizia aurretik. Iritsi zen 35garren minutua, eta Jones gazteak berriz ezustean berdindu zuen Hernanirentzat, Genuak gauzatu, eta berriz aurretik: 14-12. Eta Genuak hasia, Genuak bukatu zuen, zigor golpearekin: 17-12 eta atsedena.
Bigarren zatia gogorragoa izan zen, eta ez hain ikusgarria. Zein baino zein ibili eta gero, Hernanik entsaioa, eta Genuak gauzaketa: 24-12 eta Landaren festa polita. Ordiziak eman zion errematea, 24-17, baina berandu zen. Ikuskizuna zelaian, eta giro ederra zelaitik kanpora ere, zaletuen artean.
Minutuko isilunea partidu hasieran
Partidu hasieran minuutuko isilunean egin zen Javi eta Marcos Ormazabalen amaren omenez.
Ondoren, ohorezko sakea Hernaniko bertso eskolako kideek egin zuten, urteotan eta bereziki azken txapelketan egindako lanarengatik. Plaka ere jaso zuten.