Indarrak berreskuratuta datoz hernaniarrak gaurko derbia jokatzera. Bospasei partidu jarraian galdu ondoren, Gernikaren aurkako derbia irabazteak energia dosi ederra eman die. Bestalde, baja gutxi izango dituzte. Eta azkenik, Igor Genuak esperientzia haundia hartu du azkenaldian, 7ko serie mundialetan ibilita. Kontra izan ditzaketen faktoreak: ordiziarren irabazteko gosea, eta Landareko zelaiaren egoera kaxkarra. Emoziorik ez da faltako gaur, 16:30etan Landaren.
Australian lehenengoz, eta Zeelanda Berrian azkenekoz. Nolako esperientzia izaten ari da 7ko serie mundialetan jokatzea?
Niretzako izugarria! Zazpiko taldeetan jokatzea beste modalitate bat da. Zelaiaren tamaina betikoa izaten da, baina 7 pertsonako taldeak egiten dira, eta partiduek 7 minutuko 2 zati izaten dituzte. Asteburu bakarrean 6 partidu jokatzen dira. Izugarrizko giroa egoten da, kristoren festa, jendea mozorrotuta...
Mundu mailan, maila haundiena duen modalitatea da, eta ez nuen espero neri deitzea! Australiara joan nintzenean ez nengoen oso forma onean, jet lag-ak eragin egin zidan, eta hara iritsi eta hotelean 100 kiloko samoanoak edo Fiji eta Zeelanda Berriko jokalariak ikustea... Orduan konturatu nintzen ni tartean nengoela!
Partidu gehiagotarako deituko dizute?
Ez dakit! Bi gelditzen dira: Glasgow-Londres eta Tokio-Hong Kong. Hasieran ez nuen espero deitzea, baina behin eta berriro joan ondoren, azken hauetara joatea ere gustatuko litzaidake. Ederra izaten ari da errugbiarekin mundua ezagutzea! Kristoren suertea!
Etxera itzulita, nolako panorama ikusten duzu?
Nik partidu asko galdu ditut, baina ikusten dut taldea irabazteko gogoz dagoela. Gernikaren kontra irabazteak asko poztu du jendea, eta ni ez nintzen konsziente, baina normala da. Aurreko bospasei partidu galduta, egunero entrenatzeak eskatzen duen lanarekin, zelaiaren egoerarekin... gogorra da! Baina prest gaude erakusteko ez garela talde txarra!
Zer espero duzue Ordiziaren aurkako derbian?
Begira; beti gauza bera gertatzen zaigu. Edo hasieratik oso entxufatuta ateratzen gara, edo nora begira gabiltzan ez dakigula gelditzen gara, lehenengo kolpea jaso arte zain, gure kolpea emateko. Bestalde, Ordizia bezalako talde baten aurka maila ematea zaila da. Gainera, Cisnerosen aurkako partidua galduta etorriko dira, beraz, oso entxufatuta. Dauzkaten maila, aurrekontu eta fitxaketekin, beren helburua da Ligan dena irabaztea, eta larri dabiltza!
Besteen fitxaketek eragiten dizuete?
Ohituta gaude dagoeneko, Ligako gainontzeko guztiek baitituzte fitxaketak. Ez gaitu baldintzatzen. Besteak dira beti faborito, baina kosk egitera ateratzen gara gu, kokildu gabe.
Lehengo urteko helburua mantentzea zen. Eta aurtengoa?
Hasieran iruditzen zitzaigun aurten gehiago ere egin genezakeela. Baina gure plantilla motza da. 2-3 jokalari lesionatuz gero, oso baldintzatuta gelditzen gara. Aurtengo helburua ere mantentzea izango da, eta ahal izanez gero, zuzeneko beherako postua ukitu ere ez egitea.
Taldea dezente aldatu da lehengo urtetik, orain gazte asko dago...
Apeze, Boli, Iraitz, Zumalabe... Asko falta dira. Eta gazteentzat ez da erraza izan. 18 urterekin zuzenean lehenengo mailan borrokan hastea, partidu osoak jokatzea, eman zaien ardura... Baina oso ondo ari dira. Jendea helduago ikusten dut, burua bere lekuan.
Nola dago zelaia?
Gaizki! Ari dira ahalegina egiten baina! Jokatuko dugu, baina ez da zelai polita izango. Tristea da beti berdina gertatzea, eta ez gara asko kejatzen! Badakigu zer dagoen. Uholdeetarako gunea da, eta normala da. Gainera, bi zelai dauzkagu eta... Horixe, ez gara kejatzen!
Zer gertatuko da Ordiziaren aurkako partiduan?
Partidu gogorra izango da. Aurrelariak batak besteari bere legea inposatzen saiatuko dira, eta irabaziko du akats gutxien egin eta bestearenak aprobetxatzen dituenak. Partidu parekatua izatea espero dugu. Aurrelari onak dituzte, eta gure lana izango da haiek gelditu eta gure jokoa egitea.