Auzotarrak elkartzeko leku baten beharra zuen Epelek eta atzotik badute txoko propioa. Bizilagunen artean auzolanean egindako aterpea inauguratu zuten atzo eguerdian, lehen umeentzako parkea zuten leku berean. Urritik aritu dira lanean, eta bukatu dute estalpe berria. Auzo guztiarentzat egindako lana izan da, baita umeentzat ere, parkearen zati bat barruan jarri baitute. Imanol Lizeaga Auzo Alkateak hartu zuen hitza inaugurazioan, eta bizilagunek egindako lana azpimarratu zuen, lehendabizi: «izugarrizko lana egin duzue, lan haundia, auzolanean egina; eskerrik asko guztion izenean». Modu batera edo bestera, aterpea posible egin duten guztientzat ere, izan zituen hitzak atzo Lizeagak: «guztioi esker egin da aterpea: auzotarrak, diseinatzailea, teknikaria, eta Pili Mitxelena, materiala gordetzeko ondoan zegoen aterpea utzi diguzulako. Baita inguruko enpresei esker ere, auzoari eta proiektuari eman diozuten babesagatik». Auzo Alkateari Mikel Ormazabal apaizak hartu zion erreleboa; proiektua bera goraipatu zuen eta bedeinkazio eman zion aterpeari.
Hamaiketakoarekin estreinatu zuten
Aterpea inauguratuta, estreinatzeko aitzakia askorik ez zuten behar atzo bizilagunek, eta hamaiketako eder bat antolatu zuten.