Emakumeek autonomia izatea bilatzen dute Jabetze Eskolek, bizitzari aurre egiteko indarra eta konfiantza izatea. Bide horretan, bost tailer antolatu ditu Udaleko Berdintasun Kontseiluak. Otsailetik ekainera izango dira guztiak, egun batekoak batzuk, eta gehiagokoak besteak.
Emakume idazleak
eta nobela historikoa,
lehenengo tailerrean
Sei saio izango ditu Kultura birdefinitzen izeneko tailerrak. Emakumeei eta beraien historiei buruz idatzi zuten emakume nobelagileak aztertuko dira tailer honetan. Martxoaren 6 eta 20an, apirilaren 10ean, maiatzaren 8 eta 22an eta ekainaren 5ean izango dira saioak. Plaza Feministan izango dira guztiak 18:30etatik 20:30etara. 12 orduko tailerra izango da, 12 euroko prezioarekin.
Autoa prest izateko,
mekanika tailerra
Emakumeek eta gizonek gaitasun berdinak dituztela eta, praktikan ere hala sentitzeko mekanika tailerra antolatu dute. Autoaren osagai nagusiak zeintzuk diren eta non dauden ikasiko dute, eta bide batez, oinarrizko ezagutza jasoko dute autoa prest izan eta mantentze lanak egiteko. 3 orduko ikastaroa da, apirilaren 5ean, 10:00etatik 13:00etara. Prezioa, 3 euro.
Gorputza ezagutzeko
tailerra, hirugarrena
Osasuna izena du hirugarren tailerrak. Zoru pelbikoa ezagutzea da honen helburua, fisioterapia, sexologia eta kontzientzia hartzeko ikuspegiak landuko dira. Ez da lesioak sendatzeko ikastaroa izango, aurrea hartzeko baizik. Hiru saio izango dira, martxoaren 15, 22 eta 29an, euskeraz. Biterin emango dute, 09:30etatik 12:30etara. Prezioa, 9 euro.
Nola erlazionatzen gara?
Norbere buruarekin eta bikotearekin erlazionatzeko modua aztertuko dute laugarren tailerrean. Indarkeria ate azpitik sartzen uzten al dugu? Otsailaren 27tik apirilaren 10era izango da tailerra, 21 ordukoa. Gaztelaniaz emango dute, Biterin, 17:00etatik 20:00etara. Prezioa 21 eurokoa da.
‘Maitasuna, bikotea eta
itunak’ tailerra, maiatzean
Lotura, segurtasuna, zerbait garela sentitzea... behar batzuk ditu gizakiak. Maitasuna guk ezagutzen dugun bezala izan al da beti? Maitasuna, bikotea eta itunak tailerra emango dute Plaza Feministan, maiatzaren 10ean; 09:30-13:30 eta 15:00-19:00 ordutegian izango da. Prezioa, 8 euro.
Izen ematea, asteartera arte
Tailerretan parte hartu nahi dutenek asteartera arte dute izena emateko aukera: 943 33 70 17, maialen-a@hernani.net edo Udal Berdintasun arloan, Plaza Feministaren lokalean. Izena ematean eskatzen dutenentzat haurtzaindegi zerbitzua egongo da.