Abortuaren gaia lantzeko Asanblada Feminista deitu dute gaur Hernaniko sei taldek: Hernaniko Bilgune Feministak, Kafeta Feministak, Gazte Asanbladak, Ernaik, Katxazarrak eta Ikasle Abertzaleak. Justizia Ministerioak proposatu duen lege erreformaren inguruan ariko dira. Gure gorputza, gure erabakia. Abortuaren gaia lantzeko asanblada Feminista da gaia, eta Biteri kultur etxean izango da, 19:00etan hasita. Ahalik eta herritar gehien elkartzea nahi dute, guztien artean erantzuna zein izango den pentsatzeko. Egoera zein den aztertuko dute lehendabizi eta ondoren, honen inguruko iritzia ematea, hausnartzea eta eztabaidatzea izango da helburua.
«Gurea gorputza,
gurea erabakia»
Gaia landu aurretik, eztabaida bera non dagoen kokatzea da aurreneko pausua, eta gaurko deialdia egin dutenek argi dute: «eztabaida ez da bizitza ote dagoen, abortuak bizia hiltzen duen... gure ustez, eztabaida dago emakumeok dugun erabakitze eskubidean, emakumeok gure gorputzaren jabe garela aldarrikatu behar dugu. Gure erabakia da gorputzarekin zer egin, ama izan ala ez izan, noiz izan... ez elizarena, estatuarena edo beste instituzioren batena».
«Haurdunaldia eteten duten 10etik 9k ez dute haurdun geratu nahi»
Plataforma feministak dio, eztabaida etika moralaren aldetik enfokatu dutela eta errealitateari buruzko datuak manipulatu egin dituztela: «familia eredu tradizionala, patriarkala eta heteronormatiboa indartu nahi dute».
Bestalde, plataformako kideek diote, haurdunaldia bertan behara uztea erabakitzen duten emakume gehienek arrazoi bera dutela: «10etik 9k ez dute haurdun geratu nahi, eta hori izaten da arrazoia. Jakin eta berehala hartutako erabakia izaten da. Abortuen %97,7a aurreneko asteetan praktikatzen da. Abortatzea beraz, ez da inkontzienteki eta kapritxoz hartutako erabaia izaten, modu kontzientean hartutakoa baizik. Badakigu gure gorputzarekin eta bizitzarekin zer egin nahi dugun, askeak garelako. Eskubidea dugu gure gorputzaz, sexualitateaz eta bizitzaz nahi dugun bezala gozatzeko».