Askotan gelditzen zaizkigu txiki aurreko urtean erabilitako mozorroak. Era berean, urtetik urtera jantzi berri bat erabili nahi izaten dugu Inauterietan. Horregatik, aprobetxatzeko moduan dauden traje eta osagarriak trukatzeko merkatua antolatu du Gibelaldek, Lizeagako auzo elkarteak.
Azoka datorren larunbatean egingo da, hilak 15, goizeko 11:00etatik 13:00etara bitartean, auzo elkartearen egoitzan (Larramendi kalea, 11 behea).
Trajeak jaso, hilaren 12 eta 13an
Trukean eman nahi diren mozorro eta osagarriak uzteko eta merkatuaren inguruko zalantzak argitzeko egunak ere jarri dituzte: hilaren 12an, asteazkena, 18:30etan, eta hilaren 13an, osteguna, 19:00etan, elkartearen egoitzan bertan.
Bestalde, otsailaren 14an, utzitako jantziak berrikusi eta antolatuko dira, 19:00etan.
Bazkide kanpainak aurrera jarraitzen du
Bestalde, Gibelalde elkarteko bazkide kanpainak martxan jarraitzen du. Batetik, bazkide berriak lortu nahi dituzte, eta bestetik, lehengo urteko bazkideek bazkidetza berrestea.
Horretarako aukera izango da otsailaren 11, 18 eta 25ean, egoitzan (19:30-20:30).