Bigarren Eskuko Azoka jarriko da larunbat honetan Atsegindegin, 10:30etatik 13:30etara. Guztira, 60 bat posturentzako dago tokia, eta oraingoz, 17 dira izena eman dutenak. Izena emateko interesa duenak berrerabilpen zentrora jo behar du (Nafar kalea 19), edo harremanetan jarri telefonoz edo postaz: berrera2@gmail.com edo 661 331 113/ 682 741 366. Aikari Lizasok kudeatzen du azoka, eta «larunbaterako 25 postura iristea» espero dutela dio.
Azoka, hileko bigarren larunbatean
Urtarrileko azokan jarri zen postu kopurua normalean baino txikiagoa izan zen, Aikari Lizasok dioenez. Bere ustez, jaitsiera horren arrazoietako bat izan da azoka eguna aldatzea. «Agian oraindik jendea ez da ohitu, eta itxaron egin beharko dugu. Azoka hileko bigarren larunbatera pasatzea erabaki dugu Behemendiko azokarekin bat egin dezan, egun horretan jende dezente ibiltzen baita kalean. Hala ere, egun berean Donostiako Bigarren Eskuko Azoka ere egiten da, eta ulertzen dugu batzuk hara joatea. Baina jendea hasi da Hernaniko postuetara hurbiltzen».
Martxotik aurrera, Urbietan
Aldaketa gehiago ere badituzte buruan. Oraingoz, azokak Atsegindegin jarraituko du, baina, gutxi gorabehera martxotik aurrera postuak Urbieta kalean jartzeko asmoa dute. «Behemendiko azokan jende dezente ibiltzen dela aprobetxatu nahi dugu Bigarren Eskuko Azoka Urbietan jartzeko, eta hartara, segida moduko bat emateko. Martxotik aurrera, edo eguraldi hobea egiten hasten duenean jarriko ditugu han postuak. Presentzia haundiagoa izango dugu».