H1!ek eta EAJ-PNVek salatu dutenez, udal gobernuak hautsi egin du Sektore Publikoko eta Administrazio Publikoko Kontratazio Legea. Horrela diote H1!ek eta EAJk: «Legeak dio, 60-1-f artikuluan, enpresa bateko titularra udaletxe bateko zinegotziaren bikotekidea bada, enpresa horrek debekatua daukala udaletxe horrekin kontrataziorik egitea».
Iñaki Arratibelek eta Andoni Amonarraizek diotenez, bi alderdiek horrelako kontratu baten zantzuak zituzten eta txostena eskatu zioten udal kontratazio teknikoari, hark esan zezan kontratazio hori legezkoa zen edo ez. Ostiralean iritsi omen zen txostena. «Gure errezeloak konfirmatu zituen txosten horrek. Kasu honetan ezin zen kontrataziorik egin ez Hernaniko Udala eta ez Ongintza Patronatuarekin». Horregatik, oharrak dio modu ilegalean egin dela kontratua, enpresa horren titularra Bilduko zinegotzi baten bikotea delako.
«Ardura larria»
Prentsa oharrak arduragabekeriaz hitz egiten du, «enpresa horrek 2012an 20.161 euro kontratatu zituen udalarekin, eta 2013an 12.852 euro. Gure ustez arduragabekeria politiko larria izan du zinegotzi horrek, eta baita udal arduradun politikoek ere, jakinda bi pertsona horien artean zein erlazio zegoen».
Bi alderdiok uste dute Alkateak hitz egin beharko lukeela honi buruz. «Ardura haundiena daukanez, Luis Intxauspe Arozamenak argitu beharko luke kontu hau, eta bere ardura politikoa hartu. Ez da beharrezkoa dirua gastatzea kanpoko txostenak eskatzen, eta udaleko teknikoetaz fidatzen ez badira, ordain dezatela beren partiduko diruarekin txosten hori, eta ez herritar guztien diruarekin». Azkenik, Kontratazio Batzordeari eskaera egin diote, «neurriak jarri ditzala horrelako despisteak saihesteko, bai despiste etiko eta bai legalak».