Eguzki plataformak dioenez, Jaurlaritzak diru gutxi dedikatuko dio datozen urteetan uholdeen kontrako neurriak hartzeari. Hernaniko Kronikari bidali dion prentsa oharrak esaten du, uholdeen kontrako planak 15 aktuazio eta 60 miloi euro aurreikusten dituela Urumean egiteko, baina oraindik Karabelgo zubia bakarrik egiten ari direla.
«Aurrekontuei begiratu»
Eguzkik ez du uste Jaurlaritzarentzat estrategikoa denik uholdeei aurre egitea, eta bai ordea AHTa bukatzea; hori erakusten omen dute bakoitzari dedikatzen zaizkien diruek. «Uholdeen ondoren oso hunkituta hitz egiten dute politiko guztiek, baina ez horri begiratu, begiratu zenbat diru aurreikusten den proiektu bakoitzarentzat. Uholdeen kontrako planak 60 miloi euro aurreikusten ditu Urumean 15 aktuazio egiteko. Horietatik bakarra dago hasita, Karabelgoa. Horrez gain, Eusko Jaurlaritzak dio Urumean 20 miloi euro bakarrik gastatu ditzakeela bi urtetan, dirurik ez dagoelako».
Eguzkik konparazio bat ere egiten du. Batetik, EAEn uholde arriskua duten zona guztiak moldatzeak 1.000 euro balio omen ditu, eta AHTaren Astigarraga-Irun zatiak 800 miloi euro inguru. «Baterako dirua bilatzea ezinezkoa dela dio Jaurlaritzak, baina besterako dirua jarri eta jarri ari da, Espainiako Gobernuari aurreratu ere egin dio dirua. Beraz, badago dirurik ala ez dago dirurik? Zer da estrategikoagoa, Urumean 60 miloi euro gastatzea (kalte ordainetan 100 gastatu ziren 2011n), ala askoz gehiago gastatzea inora ez dijoan AHTan?»
Horrela bukatzen du Eguzkik, «uholdeen kontra benetako erremedioa litzateke eraikin guztiak bertatik kentzea; baina nola hori ez den egingo, bitartean neurriak hartu ditzagun kalteak ahalik eta txikienak izan daitezen: bai kalte materialak, eta batez ere, pertsonalak».