Kolorez betetako lakasitoek iragarriko dituzte 2014ko Inauteriak. Hilabeteko azkeneko asteburuan ospatuko dira Hernanin, eta Naia Querejeta hondarribiarrak egindako kartelak iragarriko ditu. Aste honetan bertan jakin du notizia: «egia esan, berria jaso baino lehen nik deitu nuen, banekien eta, zein egunetan jakingo zen. Eta hura sorpresa galdetu eta irabazlea ni nintzela esan zidatenean!».
«Zailena da landu nahi duzun gai hori bilatzea»
Diseinatzailea da Naia Querejeta, eta bere burua kuriosa gisa definitzen du. Lakasitoen irudia eta tipografi berezi bat uztartu ditu kartelean: «azken finean irudi bat eta letra batzuk uztartu ditut. Horri forma ematea da ondo egin beharreko lana; argazkia tratatu egin dut eta ondoren tipografia gehitu. Lakasitoak atentzioa eman izan didate beti, oso politak eta grafikoak iruditzen zaizkit. Jai guztiak izaten dira koloretsuak, eta inauteriak bereziki. Irudi hori kolorez betetako lakasitoek ondo erakusten dutela uste dut, indarra ematen diotela kartelari. »
Kartela egiten hasi aurretik ordea, ideia bera garatzea izaten da zailena: «enkargu eta lehiaketa bakoitza mundu bat izaten da. Eskatzen dizuten horretara egokitu behar izaten da batzuetan, eta beste batzuetan, askatasun gehiago izaten da. Zailena, nik uste, nahi duzun kontzeptu hori bilatu eta garatzea izaten da».
«Sariek beti
laguntzen dute»
Lehendik ere aurkeztu izan da Naia Querejeta gisa honetako lehiaketetara. Hirugarren sari bat lortua zuen aurretik, baina kartel onenaren saria lehendabiziko aldiz lortu du: «Hondarribiarra naiz, eta bertako lehiaketetara aurkeztu izan naiz; irabazten dudan aurreneko aldia ordea, hau da. Lehiaketak loteria hutsa direla uste dut, hau da, irabaztea ez dela batere erraza. Noizbehinka helburua lortzeak ordea, poza ematen du, eta aurrera jarraitzeko animo gisa hartu dut. Lehiaketa hauen alde polita da, egindako lana jendeak ikusi egingo duela eta horrek motibatu egiten zaitu. Sariek ere, noski, beti laguntzen dute.