Hernaniko Kaxko historikoa txukun mantentzeak duen garrantziaz jabetuta, ekimen desberdinak jarri dituzte martxan Hernaniko Udalak eta Kaxko Elkarteak. Udalak, panelak jarri ditu herriko 13 puntutan, bertan, herritarrek kartelak eta informazioa zabaldu ditzaten. Ekimen hau aurrera eramateko, herriko hainbat talde eta elkarterekin harremanetan jarri zen bere garaian Udala; hainbat bilera egin zituzten. Kaxko Elkarteak, berriz, txukuntasuna bultzatzeko, kartel lehiaketa antolatu du.
Kartela jartzen duenak,
kentzeko konpromisoa
Panelak jartzeko tokiak eta funtzionamendurako arautegia ere adostu zituzten bilera horietan. Arauei dagokienean, ezin da jarri kartelik paneletatik kanpo (ez bada baimena emandako denden eskaparateetan, tabernen barruan...), kartelak zeloarekin jarri behar dira, kartela jartzera dijoanak berea jarri aurretik pasatako ekintzen kartelak kendu beharko ditu, eta Udalak panelen garbiketa egingo du, hilabetean behin (azkeneko astelehenetan). Arautegi hau, hasierako izango da eta beharren arabera egokitzen joango dira.
13 puntutan eta
markesinatan
Panelak herriko 13 puntutan daude: Gudarien plazan bi; Udaletxe atzean, Lizeaga kalearen hasieran; Pana parkean, igogailuaren bi alboetan; Kardaberaz kalean, Plaza Berri pasata; Kale Nagusian, Plaza Berri pasata; Urbieta kalean, Txantxangorri elkartearen parean; Garinen frentean, komun publikoen ondoan; Biteri kanpoan; Zinkoenea tabernaren pareko iturrian; Kiroldegiko bi sarreretan; eta atletismo pistako sarreran.
Leku horiez gain, kristalezko autobus markesinetan ere kartelak jartzeko aukera izango da.
Lau bileren ondorengo
proposamenak
Udalak lau bilera egin zituen herriko talde eta elkarteekin kartelen gaia tratatzeko: iritziak jasotzeko, proposamenak entzuteko eta erabakiak hartzeko. Bilerak izan ziren, martxoaren 21ean, apirilaren 29an, maiatzaren 22an eta ekainaren 20an.
Bilera horietan, honako proposamenak egin zituzten: herriko hainbat puntutan panelak jartzea, dendariekin hitz egitea kartelak eskaparateetan edo ateetan jartzeko, momentu puntualetan panel mugikorrak jartzea, panel elektronikoak jartzea hainbat puntutan, herria txukun edukitzearen aldeko kanpaina egitea...
Eta panelen gaiari lotuta, ideia hauek azpimarratu zituzten: panelak haundi xamarrak izatea talde guztien kartelak sartzeko; leku askotan jartzea, masifikaziorik ez egoteko; lekua adostea; materiala kontuan hartzea kartelak ez erortzeko; Udala arduratzea panelak txukun mantentzeaz; pankarten trataera adostea; herritarrek eredu ematea kanpotik etorri eta kartelak edozein tokitan jartzen dituztenei; gutxieneko arautegi bat adostea eta betetzen ez duenari tokea ematea.
Hernaniko Udalak hainbat egitasmo burutzen ari da «hirigunea balorean jartzeko asmoz». Eta panelak jartzeaz gain, honako ekimenak egin ditu: Kaxkoaren garbiketa lanak areagotzen ari da, hutsik dauden lokalen eskaparateak Hernaniko argazkiekin dekoratu ditu, hirigunea ezagutarazteko bisita gidatuak antolatzen ditu...
Kaxkoa txukun mantentzeko mezua zabalduz
Kaxko Elkarteak antolatu duen kartel lehiaketan edozeinek hartu dezake parte. Eta epea zabalik dago lanak entregatzeko. Maiatzaren 19an bukatuko da. Kartelek lemaren bat eraman behar dute. Esaterako: Kaxkoa txukun-txukun; Kaxko garbia, zergatik ez? Hiru saritu izango dira. Irabazleak, 400 euro jasoko ditu.
KARTEL LEHIAKETAREN OlNARRl-ARAUAK
1.- Nahi duten guztiek parte hartu ahal izango dute lehiaketa honetan.
2.- Jatorrizko lanek 42 cm-ko zabalera x 59 cm-ko altuera izango dute; ezinbestekoa da paperean eta kartoi-lumazko euskarrian, aurkeztea, edozein koloretan eta edozein modalitate artistikotan. Lana formatu digitalean ere aurkeztu beharko da, egindako formatu berean (42 cm-ko zabalera x 59 m-ko altuera), 300ppp-ko erresoluzioan eta CMYK erako koloretan.
3.- Kartelak lemaren bat eraman behar du. Adibidez: ‘KAXKOA TXUKUN-TXUKUN’, ‘KAXKO GARBIA, ZERGATIK EZ?’, ‘ZURE HERRIA MAITE BADUZU ZAINDU’…
4.- Lehiakideak izango dira erantzule jabetza intelektualaren ondorioetarako aurkeztu dituzten obrena, baita aurkeztu litekeen edozein erreklamazioren aurrean ere, irudi eskubidea barne.
5.- Entregatzeko epea 2014ko maiatzaren 19an bukatuko da. Jatorrizko lanak Kaxko Elkartean aurkeztu beharko dira arratsaldeko 19:30ak eta 21:00ak bitarte, asteazkenetan, sinadurarik gabe eta kartazal itxian, egilearen izena, helbidea eta telefonoa aditzera emanez.
6.- Kartela 2014ko maiatzak 21a baino lehen aukeratuko da. Aukeraketa Kaxko elkartean egingo da, bozketa bidez.
7.- Irabazleak 400 euroko saria jasoko du, bigarrenak 200 euro eta hirugarrenak 100 euro.
8.- Saritutako obra Kaxko Elkartearen jabetzan geldituko da.
9.- Beharrezkoa da 2014ko maiatzaren 24a baino lehen obra hauek erretiratzea.
10.- Erabakia apelaezina izango da.
11.- Lehiaketan partaide izateak, oinarri hauen osoko onarpena eskatzen du.