Donostialdea eskualdean turismoa egin nahi duenak aukera polita izango du ostiraletan, otordua eta loa %15 merkeago izango baititu, eskaintzan sartu diren 25 ostatu eta sagardotegietan.
Atzo aurkeztu zuten eskaintza, Akarregi sagardotegian, eta bertan izan ziren Behemendiko ordezkariak, Donostia Ruraleko ordezkariak, sagardogile eta ostalariak.
Txotx garaiko eskaintza
Eskaintza honek iraungo du apirilaren 12ra arte, txotx denboraldiaren bueltan antolatu den eskaintza baita. Behemendiko ordezkariek adierazi zutenez, «sagardoa da eskualde honen bereizgarria. Sei herritan 43 sagardotegi dauzkagu, eta hori erakutsi behar diegu bisitariei». Ostatua eta sagardotegia hartu behar dira eskaintzan sartzeko, eta erreserba ostatura deituta egingo da. Guztira 17 alojamendu eta 8 sagardotegi sartu dira eskaintzan «lehenengo urterako nahikoa» arduradunen iritziz. Eskaintzan daude Hernaniko hiru alojamendu: Arrobi eta Zinkoenea pentsioak eta Pardiola baserria; eta hiru sagardotegi: Iparragirre, Akarregi eta Itxasburu. Informazio gehiago: www.sagardotegia.com.