Aurten ere ez dute hutsik egingo Hernaniko palistek Euskal Herria Irekia Txapelketan. Hain zuzen, Hernaniko Pala Taldeko sei kidek hartuko dute parte, bi mailatan. Aurreneko mailan, Maider Huizi, Maider Senper eta Miren Goikoetxea urnietarra ariko dira. Bigarren mailan, berriz, Garazi Jauregi, Leire Lucas eta Garbiñe Tijero. Txapelketa gaur hasiko da eta aurreneko jardunaldi honetan hernaniarrak ere izango dira lehian. Goikoetxea eta Huizi elkarrekin ariko dira eta Muneta-Larrion bikote nafarra izango dute aurrez aurre. Donostiako Atano III pelotalekuan jokatuko dute, 16:00etan. Tijerok ere gaur jokatuko du. Soraluzeko Ariznabarreta izango du lagun eta Gutierrez-Maiza bikotea aurkari. Lizarran jokatuko dute, 16:00etan. Gainerakoek datorren larunbatean ekingo diote txapelketari. Kronika Huizi eta Senperrekin elkartu da euren inpresio eta helburuen berri izateko.
Bikote ezaguna eta ezezaguna
Maider Senperrek 18 urte ditu eta Maider Huizik 17. Gazteak dira, baina bide puska bat egina dute pala munduan. 11 urte, hain zuzen, eta pare bat urte daramazkite, batez ere, lehenengo mailan jokatzen. Esperientzia ere badute txapelketa honetan. Senperrek laugarren aldiz hartuko du parte eta Huizik hirugarrenez. Azken honen bikoteak, Miren Goikoetxeak ere, laugarren aldiz jokatuko du txapelketa.
Txapelketa hau, izenak dioen bezala, irekia da eta nahi duenak hartu dezake parte, nahi duen bikotearekin. Huizik eta Goikoetxeak askotan jokatu dute elkarrekin; iaz ere bai, txapelketa berean, eta elkarrekin jokatzea erabaki dute. Senperrek, berriz, ez zuen asmorik parte hartzeko, baina Agirrek, bere bikote izango denak deitu omen zion: «Berarekin jokatu nahi nuen galdetu zidan eta baietz esan nion». Ez dute elkarren jokoa apenas ezagutzen: «Bere kontra jokatu izan dut, baina berarekin inoiz ez», dio Senperrek.
Aurreneko partidua,
onenen aurka
Hasiera gogorra dutela diote bi palista hernaniarrek. «Gure aurkariak nafarrak dira. Askotan aritzen dira elkarrekin eta gu baino esperientzia gehiago dute. Gainera, orain dela gutxi jokatu dugu elkarren kontra txapelketa batean eta beraiek finalera iritsi ziren. Gure multzoko bikote gogorrena dela esango nuke», azaldu du Huizik. Senperrek ere modu berean ikusten ditu beraien aurkariak: «Gure aurkariak Gasteizkoak dira eta oso bikote sendoa osatzen dute. Txapelketa irabazteko faborito ikusten ditut».
Orokorrean, maila haundia egoten dela eta ez dutela finalera iristeko esperantza askorik diote biek: «Txapelketa honetan onenen aurka jokatzen da eta ikasteko balio du. Ez dugu beste helbururik». Beraz, elkarren arteko finalik ez dela izango uste dute: «Gutako bikote bat pasatzea ere nahikoa litzateke».
Martxoaren 8an, finalak
Txapelketa gaur hasi eta martxoaren 8an bukatuko da. Otsailaren 15era bitarte, lehenengo fasea jokatuko da eta liga moduan izango da. Azken fasea, berriz, (finalaurdenetatik hasita) kopa moduan jokatuko da. Partiduak lau pelotalekutan jokatuko dira: Mallabia, Lizarra, Gasteiz (Tukun-Lakua) eta Donostiako Atano III. Lehenengo mailan 10 bikote izango dira lehian eta bigarren mailan, 14.
Ilusioa, maila altuenean daudenei irabaztea
Huizik eta Senperrek ia bizi guztia daramakite palan jokatzen. Huiziri betidanik gustatu izan omen zaio pala. Senperri, berriz, hasieran ez omen zion graziarik egiten. Baina amaren pausoak jarraituz, gustoa hartu omen zion.
Urte guzti hauetan, txapelketa ugaritan hartu dute parte (Gipuzkoa eta Euskal Herriko txapelketak, Emakumea Pilotari, GRAVN, Kutxa Saria, Napar Pala Txapelketa...) eta hainbat txapel irabazitakoak ere badira. Azkenak, orain gutxi: Huizik Nafar Pala Txapelketan eta Senperrek Emakumea Pilotarin, bigarren mailan.
Bereziki ilusioa egin dien garaipenik edo txapelketarik ba ote den galdetuta, honakoa diote: «Espero ez duzunean eta finala gogorra izan denean, beti egiten du ilusioa. Baita txapelketa zail baten ondoren irabazteak ere. Txapelketari dagokionean, Nafar Pala, Kutxa Saria edota GRAVN jokatzeak ilusio berezia egiten du. Izan ere, txapelketa horietarako aukeratu egiten zaituzte».
Aurrera begira, ze ilusio edo helburu duten galdetuta, berriz, honakoa erantzuna: «Momentu honetan maila altuenean daudenei irabaztea, hau da, Maider Mendizabali, Nagore Arozenari... Eta ez du finala izan beharrik; edozein partidu».
Hernaniarren partiduak
GAUR
Lehenengo maila: Muneta-Larrion/Goikoetxea-Huizi
Bigarren maila: Tijero-Ariznabarreta/Gutierrez-Maiza
Otsailak 8
Lehenengo maila: Senper-Agirre/Saez-Martin
Goikoetxea-Huizi/Arrizabalaga-Villanueva
Bigarren maila: Valvo-Ruiz de Azua/Lucas-Jauregi
Aldai-Eizmendi/Tijero-Ariznabarreta
Otsailak 15
Lehenengo maila: Aristorena-Aristorena/Senper-Agirre
Landaluce-Isasmendi/Goikoetxea-Huizi
Bigarren maila: Lucas-Jauregi/Murillo-Lusarreta
Tijero-Ariznabarreta/Lopez de Luzuriaga-Jausoro