Dantza da down sindromea duten askoren espresio-bidea, eta horretantxe oinarritu dute erakusketa Sofia Arostegik eta Jose Luis Elexpe Pelex-ek. Bateginik erakusketa ikusgai dago otsailaren 11ra arte Biterin, eta inaugurazio ofiziala gaur egingo dute, 19:15etatik aurrera. Isabel Verdiniren dantza taldea ere bertan izango da, inaugurazio ekitaldian.
Down sindromea ardatz
Erakusketa down sindromeari buruzkoa da. Arostegik ahizparekin bizi izan du kasua, eta Pelexek ere asko lan egin du down sindromea dutenekin. Sentsibilitate hori euren lanera eraman dute, eta 24 koadro eta 10 eskultura jarri dituzte, mugimenduz beteak. Arostegik garbi dauka «emozionalki erakargarria eta sakona da gai hau, eta hori nahi genuen».
Aspaldi ezagutzen zuten elkar, baina lehendabiziko aldiz jarri dute erakusketa bat elkarrekin. Pintura figuratiboagoa da Arostegirena, eta Pelexek abstraktuagoa egiten du, baina emaitza polita lortu dute biak elkartuta.
Erakusketa honekin beste ideia asko sortu zaizkiela diote biek. «Erakusketa hau oinarritu dugu down sindromea dutenen espresio bide batean, dantzan, askatasuna ematen dien artea delako, eta sekulako indarrez transmititzen dutelako euren sentimendua, dantzaren bidez». Dena dela, ideia pila bat sortu zaizkie erakusketa hau egiten hasita, eta aurrerago ere erakusketa gehiago jartzeko asmoa dute biek.
‘Verdini’ taldea eta Naroa Azaldegi, gaur, Biterin
Isabel Verdinik dantza talde ezaguna dauka Donostian, down sindromea duten pertsonez osatua ia erabat. 20 urte inguru daramazki Verdinik talde horrekin lanean, eta ezin hobea iruditu zaie Pelexi eta Arostegiri gaurko inaugurazio ekitaldira eurak gonbidatzea. Arratsaldeko 19:15etan bi artistek hitz egingo dute, eta ondoren Verdini dantza taldeak erakustaldia egingo du. Besteak beste, tartean izango da Naroa Azaldegi hernaniarra, protagonisten artean. Dantza saioaren ondoren, luntxa egingo dute.
Bi astez Hernanin
Asteartean zabaldu zuten Bateginik erakusketa, eta bi astez egongo da Biterin, otsailaren 11ra arte. Astelehenetik ostiralera ikusi ahal izango da, 18:00etatik 20:00etara, erakusketa gelan.