Eltzeak, pertzak, paderak eta mailuak dantzan ibiliko dira beste behin ere kalderero egunez, larunbat gau honetan. Inauterien iragarleak aurten sekula baino garaizago datoz, eta hilabete lehenagotik sartuko dira Hernaniko kaleetan barrena. Kaldereroen konpartsa Elur Txori elkarteak antolatzen du, eta bertatik abiatuko dira larunbatean, gaueko 21:00etatik aurrera.
Kale buelta Oarson abiatuko dute, Elkano, Larramendi, Arantzazu plaza, eta Xalaparta elkartea. Han, geldialdia eta kantua. Xalapartatik, Gudarien plazatik Kardaberazen barrena Plaza Berrira, eta han beste geldialdia. Azkenik, Kale Nagusitik berriz Gudarien plazara igota han bukatuko dute.
Entsaioa eta afaria
Azkeneko entsaioa gaur egingo dute Elur Txori elkartean, 20:00etan. Horrez gain, larunbatean afaria dago Elur Txorin, 19:30etan, eta apuntatzeko zerrenda jarri dute elkartean (7 euro).