Urumea ibaiak gainezka egin zuen atzo, gauerdia pasa eta berehala. Euri asko egina zen astelehenetik, 115 litrotik gora eta egoerak okerrera egin zuen ostiraleko azken orduetan, alerta naranja aktibatzeraino. Portu eta Karabelgo erriberetan atera zen ura lehendabizi; eta baita Landare eta Zubipe zelaietan, Ergobi inguruan, AHTren obretan...; hauek baitira, uholde arrisku gehien duten puntuak. Goizaldeko 02:00ak aldera ere, zertxobait atera zen Fagollaga inguruan. Goizean egoera baretu egin zen eta ibaiaren maila pixkana jaisten hasi zen. Eguerditik aurrera zaparradak espero ziren, eta euria egin bazuen ere, egoerak ez zuen okerrera egin. Iluntzerako alerta guztiak desaktibatu zituzten.
Euririk ez da
espero gaur
Euriak atsedena eman, eta eguraldiak hobera egingo du gaur. Hala, eta pixkanaka, ibaia bere onera etortzea espero da. Bihartik aurrera, eta asteazkenera bitartean, fronte berria espero da, eta euri dezente egin dezake.
Añarbe ura askatzen
Añarbeko urtegiak ateak itxita mantendu zituen atzo, alertak iraun bitartean. Iluntzean, Urumearen altura 1,9 metrora jaitsi zenean, ura askatzen hasi ziren. Pixkanaka eta proportzionalki hasi ziren urtegia hustutzen, beti ere, 2,1 metroko muga gainditu gabe. Urtegia bete-betea zegoen atzo iluntzean, eta lekua egitea da helburua, bihartik aurrera espero den euria jasotzeko.
Errumaniarrak,
kanpalekura bueltan
Alerta medio, Txoritegiko kanpalekuan bizi ziren errumaniarrak desalojatu egin zituen Udalak atzo goizaldeko 04:30ak inguruan. 27 pertsona ekarri zituzten, Udaltzaingoaren kotxeetan, Sandiusterrira. Bertan pasa zuten eguna eta gaur kanpalekuetara itzuliko dira. Bihartik aurrera euri dezente espero da, eta berriz desalojatu behar izanez gero, Gabriel Zelaiara eramango dituzte.
Karabelen ez aparkatzea
Gaur ateri eutsiko badio ere, bihartik aurrera euri asko espero da. Hori horrela, prebentzio neurri gisa, Udaltzaingoak eskatu du Karabelen ez aparkatzea, batez ere gauez, arriskuaren aurrean jendea lasai egon dadin.