Badira urte batzuk Donostiako bizilagunak kexu direla, usain txarra dela eta. Zenbait auzotan izaten da usain txar hori, eta jatorriaren inguruan hipotesi asko izan dira orain arte. Arazoa medio, Donostiako Udalak ikerketa bat egiteko konpromisoa hartu zuen, Eusko Jaurlaritzaren laguntzarekin. Eguzki ekologista taldeak ikerketa horren emaitzaren berri eman nahi du, Kronikara bidalitako prentsa oharraren bidez.
«Zurrumurruek ziotena
konfirmatu da»
Ikerketa Kataluniako enpresa batek egin du, eta Donostiako Ingurumen Batzordean eman zuten emaitzaren berri. Eguzkiren esanetan, ikerketak konfirmatu du zurrumurruek ziotena: «Usain txarra Zikuñagako Papelera Guipuzcoana S.A enpresatik dator. Ikerketan ikusi da, usain txarra dimetil sulfuroak sortzen duela, eta sulfuro hori, papeleraren produkzioaren momentu batean sortzen dela».
Eguzkik ontzat jo du ikerketa, eta orain pausoak emateko garaia iritsi dela dio: «Donostiako Udalari eta Eusko Jaurlaritzari eskatzen diogu ikerketaren berri emateko, jendeak jakin dezan usainaren jatorria zein den. Bestetik, Papelerari eskatzen diogu pausoak emateko, usain hori desagertarazi edo ahalik eta gehien gutxitzeko».
Papelerak askotan erantzun izan du legea betetzen duela, baina Eguzkik dio, ez dela nahikoa: «Usaina deserosoa da Urumeako bizilagun guztientzat. Ez dago ordenantza zehatzik usain kontaminazioa erregulatzeko, baina bizi kalitatean eragina du. Arazoari aurre egiteko garaia iritsi da».