Ohiturak aldatuz joan dira, eta horrekin batera, baita ere gazteak elkartu eta ondo pasatzeko moduak ere. Azken urteetan gazte lokalen fenomenoa da, nabarmen hedatu den joeretako bat. Geroz eta gehiago dira, aisialdi tarte horiek pasatzeko, lokalak alkilatzen dituzten gazteak. Hori horrela, Hernaniko Udalak erabaki du prozesu partehartzailea martxan jartzea. Hausnarketa egin nahi da eta elkarbizitza oinarri hartuta, alde guztien arteko protokoloa adostu. Herritarren arteko elkarbizitza protokoloa da adostu nahi dena: gazteak, bizilagunak, jabeak, adin txikikoen gurasoak...
20tik gora gazte lokal
daude Hernanin
Prozesu partehartzailearen aurkezpenean, Udalak argi utzi zuen gazte lokalen joera ez duela «arazo bezala» ikusten, baina «hausnarketa bat» eskatzen duela. Hernanin 20 lokaletik gora erabiltzen dituzte gazteek, eta herriko auzo batzuetan besteetan baino gehiago hedatu dira; Lizeagan, esaterako.
Zein dira prozesu
honen helburuak?
Prozesu partehartzailearen harira, lau helburu nagusi zehaztu ditu Udalak. Batetik, aipatu bezala, gazte lokalen fenomenoaren inguruko hausnarketa egin nahi da, gazte identitatearen definizioan jokatzen duten papera aztertuz. Lokalen fenomenoaren inguruko ezagutza zabaltzea ere bada helburua, ikuspegi ezberdinak batu, eta osoago bat izateko asmotan. Baita ere, azterketa bat egin nahi da, lokalen baldintzak zein diren aztertu eta hausnarketa egiteko. Eta bukatzeko, hausnartu nahi da gazte lokalek sortzen duten elkarbizitzaren inguruan; hobetzeko proposamenak landu nahi dira, tartean egon daitezkeen gatazkak aztertuz eta soluziora bideratuz.
Protokoloa zehazteko,
fase ezberdinak
Gazteen, bizilagunen eta lokal jabeen arteko protokoloa zehazteko fase ezberdinak jarriko ditu martxan Udalak, otsaila bitartean.
Aurreneko fasea Udalak berak egingo du: 0 fasea deitu diote eta diagnostikoa egitea izango da helburua.
Lehenengo fasean lanean ari dira orain: zenbat lokal dauden, non, zenbat ordaintzen duten, zein baldintza dituzten, zailtasunak...
Hirugarren fasea izango da partehartzailea. Aurreneko bileran, asteazkenekoan, gazteak elkartuko dira; eta ostegunekoan, bizilagunak, lokaletako jabeak eta adin txikikoen gurasoak.
Eta azkeneko fasean, hiru bilera egingo dituzte, guztiek elkarrekin. Otsailaren 13an, Nolakoa da gazteen inguruko elkarbizitza? izango da gaia; otsailaren 27an, Nolako elkarbizitza nahi dugu? eta martxoaren 13an, Elkarbizitza... hartu eta eman.
Bilera edo saio guztiak Biteri kultur etxean izango dira, arratsaldeko 18:30etatik aurrera.