Beti Gazte taldearen aurka jokatuko du gaur Hernanik. Etxetik kanpo, Lesakako Mastegi zelaian neurtuko dira, 16:30etatik aurrera. Azken partiduetan erakutsitako jokoari jarraipena emateko asmoa dute txuri-berdeek. Urte bukaera eta hasiera oso onak izan dituzte, denboraldi hasierako porrotak atzean utziz. Eta azken partiduan liderraren aurka galdu egin bazuten ere, oso partidu serioa eta txukuna jokatu zuten. Hori horrela, 3 punturekin itzultzeko asmoa dute Hernanira. Gainera, sailkapenean gora egiteko aukera izango lukete. Izan ere, lesakarrak 8garren postuan daude; hernaniarrak, berriz, 12garrenean, eta 3 puntuko aldea besterik ez dute.
Emakumezkoen taldeak, aurkari zuzena etxean
Emakumezkoen Euskal Ligako taldeak Zarautzen aurka jokatuko du gaur. Aurkari zuzena izango dute txuri-berdeek. Zarauztarrak 8garren daude eta hernaniarrak 9garren, 2 puntu gutxiagorekin. Azkeneko partiduetan ez dute emaitza onik lortu etxeko neskek eta horri buelta ematen saiatuko dira. Neur-keta, 12:00etan Zubipen.