ATLETISMOA tradizio askoko kirola da Hernanin eta kate horri eutsi nahi dio CD Hernanik; gaztetxoek atletismoarekin duten erlazioa mantendu nahi dute, eta kirolak herrian duen protagonismoa indartu. Adarraga Memoriala korrituko da gaur atletismo pistan 50garren urtez; bada zerbait. Pepe Adarraga zenaren omenez hasi ziren antolatzen, bera izan baitzen CD Hernani sortu zuenetako bat. Baina memorialak, adarragatar guztiak izan ohi ditu gogoan, gutxi izan baitira herri honetan, kirolari hain lotuta bizi izan diren familiak.
Gipuzkoako
Eskolarteko Txapelketarako puntuagarria
Ehundaka neska-mutilek hartzen dute parte urtero, atletismoaren festa honetan. Antolatzaileen arabera, Gipuzkoa osotik etorriko dira gaur ere; 250 gaztetxo inguru espero dira Antziolako atletismo pistan. Mailaka eta sexuaren arabera banatu dituzte frogak eta guztiek puntuatuko dute Gipuzkoako Eskolarteko Txapelketarako.
Goizeko 11:00etan hasiko da gaurko saioa, eta ordulaurdeneko marjenarekin jokatuko da froga bakoitza. Alebin neskak lehiatuko dira lehendabizi, zeinek 1464 metro azkarrago egin. Atzetik, mutilak, distantzia luzexeagoarekin: 2065 metro. Infantil nesken txanda izango da ostera, 2065 metroko frogarekin; mutilek 3305 metro izango dituzte aurretik. Eta bukatzeko, benjaminak; neskek zein mutilek 890 metroko froga izango dute.
1958an aurreneko aldiz
Urte oparo asko izan ditu txapelketak; kontrapuntu gisa ordea, egin ez diren urteak ere izan dira. 1958garren urtean antolatu zuen CD Hernanik kross txapelketa aurreneko aldiz, eta denbora gutxian jarri zioten Adarraga Memoriala izena. Pepe Adarraga izan zen CD Hernaniko fundatzaileetako bat, eta baita aurreneko presidentea ere. Pepe hil eta berehala aldatu zioten izena lasterketari. Korrikalaria eta atletismo zale sutsua zen Pepe. Pareko gutxi zituen bere modalitatean. Ez zen ordea, horregatik bakarrik nabarmentzen; korrikalariei laguntzeko sena ere, barru barruan zuen Pepek: Prudentzio Aierrari, Miguel Sukuntzari... lagundu izan zien bere ibilbidean.
Club Atletico Urumea,
urte batzuetan
Adarraga Memorialak 70garren hamarkadan izan zuen dizdira gehien; 1973 eta 1977 bitarteko urteak izan ziren oparoenak. Senior mailan goi mailan zebiltzan korrikalari asko ikusi ziren Landaren: Mariano Haro, Pepe Haro, Santiago Delaparte, Carmen Valero.... Urte haietan CD Hernani izateari utzi zion atletismo taldeak, azaldu dutenez, atletismorako dirurik ez zegoelako. Club Atletico Urumea izatera pasa ziren. Beraiek hartu zuten memoriala antolatzeko ardura, eta korrikalari hobeak ekartzeko apustua egin zuten. Ez zuen ordea urte luzez iraun erronka horrek, berehala heldu baitzioten berriz bertako atleten alde egiteari.
40-50ko hamarkadan,
atletismoa nagusi
Beti izan du indarra atletismoak Hernanin, baina 40-50ko hamarkadak izan ziren urte ederrenak. Zaletasun asko zegoen, nahiz eta orduan helduek bakarrik konpetitzen zuten. Bi ekipo zituen Hernanik: A eta B. Krosseko lasterketak bakarrik korritzen zituzten orduan eta gairapen garrantzitsuak lortu zituzten atleta hernaniarrek. Atletismoan aritzen zen emakume askorik ez zen garai haietan, baina Hernanik bazuen bat, ona, pertiga saltoan: Carmen Adarraga.
Umeekin lanean 80garren hamarkadan hasi zen CD Hernani. Migel Angel Garin, Baldomero Jimenez eta Manu Irastorza aritu ziren lan horretan, eskolekin elkartu eta atletismoa sustatzeko gogoz. Ordutik korrikalari on asko eman ditu CD Hernanik.
Atletismo pistari esker,
modalitate guztiak
Azken urteetan atletismo pistak on asko ekarri dio atletismoari. Kross hutsera dedikatzetik, atletismoaren modalitate guztiak egitera pasa da CD Hernani. Antolatzaileek diote, pisten aurretik, eskoletara jo behar izaten zutela, bertako materiala aprobetxatzera. Orain ordea beharrezko guztia dute, eskura: materiala, lekua, distantzia egokiko pista, aldagelak... Atletismoa indarra hartzen ari da berriz ere Hernanin, eta egun 125 atleta inguruk osatzen dute taldea.