Udaletxeko Pleno Aretoan jendetza bildu zen atzo. Bertan, besteak beste, Hernaniko legegintzaldi eta alderdi desberdinetako hainbat alkate eta zinegotzik egin zuten bat. Epaiketa politikoei aurre egiteko elkartu ziren, Libre dinamikaren barruan.
Bertan, idatzi bat adostu eta onartu zuten. Eta azaldu zuten, Libre Manifestuaren 5 puntuekin bat egiten dutela; hau da: «Ez daitezela epaiketa politiko gehiago egin; Eskandaluzko instrukzio bidegabeetan oinarritutako epaiketa guztiak artxibatu daitezela; Prozedura judizial guztietatik etsaiaren zigor zuzenbidearen aplikazioa desagertu dadila; Aniztasun politikoa eta elkartze, adierazpen nahiz askatasun politikorako oinarrizko eskubideak errespetatu daitezela; eta Elkarbizitza demokratikorako oinarri sendoak ezarri ditzagula».
Horrez gain, auzipetu guztiei elkartasuna adierazi zieten eta hernaniar guztiei deialdia luzatu zieten, Libre dinamikaren barruan antolatzen diren ekimenetan parte hartzeko.
Bi makro-epaiketa martxan, eta Juanpe Plaza eta Garin taberna tartean Gogorarazi zuten urteetan eman direla makro-epaiketak eta egun, bi epaiketa daudela martxan: gazteena eta Herriko Tabernak deiturikoa. Tartean, Juanpe Plaza hernaniarra eta Garin taberna daudela nabarmendu zuten. «Epaiketa hauekin, aniztasun politikoa ezabatzeko ahalegin garbia ikusten dugu». Eta gaineratu zuten: «Garai berria zabaltzeko Euskal Herriak agertu duen erabakiari eraso egiten diete, konponbide baketsua blokeatu asmoz».