Goizuetak baliabide paisajistiko, arkitektoniko, natural eta historiko asko ditu, eta horien parte dira aztarna megalitikoak. Udalak bi ibilbide eginak ditu, aztarna megalitiko hauek non dauden erakutsi eta beraien inguruan aztertu eta jakin dena zabaltzeko asmoz. Datorren igandean ibilbide horietako bat antolatu du Umore Onak. Herriko plazatik abiatuko dira, eta Martitxene, Altzanburu, Añone, Errekaleku, Urgatara eta Montefrion barrena egingo dute buelta. Mendizaleei zuzendutako irteera da eta bueltaz gain, bazkaria ere antolatu dute. Azken honetarako izena eman behar da, Umore Ona elkartean; prezioa, 15 euro.
Mairubaratza asko
egoteak erakusten du
jende asko bizitu zela
Aztarna megalitikoak erakusten dute, noizbait, bertan, gizakia bizitu zela. Goizuetan aurkitu dituzten zaharrenak orain 5.000 urte ingurukoak dira. Nola bizi ote ziren?
Aurkitu diren ondare megalitikoen artean daude Tumuluak, Dolmenak eta Cromlechak. Guztien artean, mairubaratzak dira gune megalitiko hauek benetan berezi egiten dituztenak. Asko daude, multzo haundietan, eta horrek erakusten du, jende asko bizitu zela noizbait, bertan. Mairubaratzak orain 2.600 urte ingurukoak dira, eta 400 bat urteko epean egon zirela jakin da. Mairubaratza guneetatik gertu gainera, burdin minerala topatu da, eta horrek adituei pentsarazten die, garai haietan bazekitela burdina lortzen eta lantzen. Besteak beste, lan mota guztietako tresnak sortzen zituztela jakin da.