Hernanin eta Astigarragan errumaniarren kanpamenduak daudela gauza jakina da, baina ba al dakigu nola bizi diren, ze bilatzen duten, ze baldintza dituzten edota instituzioek ze plan jarri duten martxan integrazioa bultzatzeko? Hori guztia bil-tzen duen dokumental bat egin du SOS Arrazakeriak, Balta txuria, Balta berdea. Urumearen zurrumurrua izenekoa, eta gaur emango dute Hernanin. Biterin izango da ikusgai 19:00etatik aurrera.
Ordubeteko iraupena du dokumentalak eta ondoren, hizketaldia izango da. Besteak beste, bertan izango dira: Agustin Unzurrunzaga (SOS Arrazakeria), Andoni Gartzia (Astigarragako alkatea), Sorina Lunca (kanpamenduko bizilagun ohia), eta Gloria Mendinueta (Hernaniko Ongintzako zinegotzia).
Horrelako praktiken
berri eman beharra
Anaitze Agirre dokumentalaren bi zuzendarietako bat da eta helburua zein den azaldu du: «Alde batetik, argi erakustea ze onuragarria den instituzioek horrelako praktikak aurrera eramatea, Europa Ekialdeko ijitu etniako pertsonen integrazioa bultzatzeko. Bestetik, iritzi publiko ezkor eta estereotipatuari aurre egitea. Eta azkenik, beraiei hitza ematea».
Dokumentala 2012ko abendua eta 2013ko uztaila bitartean egin da eta 17 lagunei egindako elkarrizketak biltzen ditu.
2017ra arteko plana
Hernaniko eta Astigarragako Udalek, interbentzio plan bat jarri dute martxan, Eusko Jaurlaritzaren eta Gipuzkoako Diputazioaren laguntzarekin. Plana 2017ra arte luzatuko da. Helburua da, ordurako kanpamenduko bizilagunek integrazioa lortzea eta kanpamendua hutsik geratzea. Bizilagunek konpromiso bat sinatu dute, bertan ezarritako baldintzak betez.