Kupeletan sagardoak zai, sagardogileak martxan, Hernaniko Udala azpiegitura antolatuta... dena prest dago Hernaniko festarik haundienerako. Milaka lagun inguratuko dira datozen lau hilabeteetan Hernanira, sagardoa kupeletan nola egiten ari den probatzera, eta bide batez gure herria ezagutu eta egun eder bat pasatzera.
Irekiera, 12:30etan
Sagardoaren kulturak sekulako zainak boteak ditu bailara honetako lurretan, eta denboraldi honek erakusten du garbiena hori. Gaur ere ongietorria egingo diote sagardo berriari, eta ohorezko tragoa egitera gonbidatu dituztenak ondo ezagunak: ETBko Kontrako Eztarria saioko kideak.
Omenduek eguerdiko 12:30etan hartuko dute ohorezko tragoa, denboraldiko milaka eta milaka tragotan lehendabizikoa, Plaza bete hernaniarri oihu eginaraziko diena: «Hauxe da Hernaniko sagardo berria!».
Aurretik, 11:00etan hasiko da festa suziriekin eta Apaxi ipuin kontalariarekin. Trikitilariak, Kalez kale kantari, eta txalaparta hotsak ere izango dira tarte horretan. Txotx irekieran jende asko espero da, beti bezala, txandan-txandan tragoa hartuko dutenak. Gero bazkaria dute Larre-Gainen, eta arratsaldean Erromeria, Plaza Berrin (eguraldi txarra bada, Atsegindegin).
Sagar Lasterra eta Sagar Martxa, urteroko gisan
Denboraldiak lau hilabete izango ditu, eta bitarte horretan antolatu dituzte ekitaldiak, sagardoaren bueltan. Sagar Lasterra da horietako bat, herri krosa, eta gero eta jende gehiago inguratzen duena. Otsailaren 22an egingo dute aurten, eta beti bezala sagardotegietan barrena egingo dute zirkuitua, Hernaniko paraje ederretan barrena. Ibilbide tankerakoa, baina oinez egiteko, Sagar Martxan izango da. Aurten apirilaren 13an izango da oinezko ibilia eta goiz pasa, Hernaniko sagardotegiak ezagutuz egiteko.
Eta nola ez, ohiturarik haundieneko ekitaldia, sagardoaren kofrade berriak izendatzeko eguna izango da, martxoaren 16an, Tolarea Hernaniko Sagardo Naturalaren Kofradiak bere XIX. Kapitulua ospatuko baitu.
Eskaintza osoagoa eman nahian, turismoa bultzatzeko hainbat aukera ere prestatu ditu Udalak, beste talde batzurekin batera: turismo informazio puntua, bisita gidatuak, pakete turistikoa, esperientzia, edo azkenik, ostiralak indartu asmoz, eskaintza berezia, Hernaniko bi ostatu eta bi sagardotegitan, %15eko beherapenekin. (ikusi XI.or).
Elkarbizitzako arauak
errespetatzeko deia
Hernaniko Udalak dei egin die herritarrei eta Hernanira datozenei elkarbizitzako arauak errespetatzera. «Txotx denboraldia, Hernaniko sagardotegi eta sagardoak ezagutu eta dastatzeko garaia da, sustrai sendoak dituen ohitura ezagutzeko aukera ezin hobea; baina beti ere, elkarbizitza bermatzen duten arauak errespetatuz. Hernanik bisitaria zaintzen duenez, bisitariak ere Hernani zaintzea eskatzen du Hernaniko Udalak».
Komunak eta autobusak
Hainbat neurri hartu ditu Hernaniko Udalak txotx denboraldirako. Udaltzaingo zerbitzua haunditu egingo da, eta egokitu, ordu jakinetan udaltzain kopurua igota. Komun publiko gehiago ere jarriko dira, herriko erdialdean. Aparkalekuetarako bi toki izango dira batez ere, jendea bideratuko dutenak. Batetik, kanpotik datozen autobusentzat Ibaiondo poligonoan jarriko da lekua, eta kotxeentzat Karabelen 280 plazako aparkalekua erabiltzea gomendatu dute (gero igogailua erabili liteke).
Autobusak izango dira sagardotegi guztietara, Alberrora izan ezik (oinez minutu batera dagoelako). Ikusi tabla.
AUTOBUSAK
Osiñaga: Ostiral gau eta larunbat
Itxasburu, Otsua-enea, Olaizola, Altzueta, Iparragirre, Elorrabi, eta Goiko-Lastola. Zinkoeneatik
Urtarrilak 24-Otsailak 8
Apirilak 4-Apirilak 26
Eguerdian (larunbata)
Joan: 14:00
Etorri: 18:00
Gauean (ostiral eta larunbat)
Joan: 21:00
Etorri: 00:00
Apirilak 4-Apirilak 26
Eguerdian (larunbata)
Joan: 13:30 / 14:00 / 14:30
Etorri: 17:30 / 18:00 / 18:30
Gauean (ostiral eta larunbat)
Joan: 20:30 / 21:00 / 21:30
Etorri: 23:00 / 23:30 / 00:00
Akarregi, Rufino, Zelaia
Autobus gorria - Areizaga - A1-A2.
Larre-Gain: Ostiral gau eta larunbat
Elkanotik (Larre-Gain izeneko autobusa)
Eguerdian (larunbata)
Joan: 13:30
Etorri: 18:00
Gauean (ostiral eta larunbat)
Joan: 20:45
Etorri: 00:00