Urumea ertzeko errumaniarren kanpamenduak zer pentsatua denei eman die, baina zenbat dakigu errealitate horri buruz? Sos Arrazakeria taldeak dokumental bat egin du horri buruz, eta ostegunean aurkeztuko du, 19:00etan, Biterin: Balta txuria, Balta berdea: Urumearen zurrumurrua. Dokumentala eta gero hizketaldia izango da eta lau lagunek hitz egingo dute bertan: Andoni Gartzia Astigarragako Alkateak, Sorina Lunca kanpamenduan bizitutako errumaniarrak, Agustin Unzurrunzaga SOS Arrazakeriako kideak, eta Glori Mendinueta Hernaniko Udal Ongintza zinegotziak.
«Ijitoak herrietatik bidali egin izan dira, edo ez-ikusiarena egin izan zaie»
Astigarragako Udalak auzo gisan onartu ditu errumaniarren bi zonaldeak, eta hori izan da, hain zuzen ere, dokumentala egiteko arrazoia. SOS Arrazakeriak oso garbi adierazi du, benetan ereduzkoa iruditu zaiolako jokaera. «Ijitoak herrietatik bidali egin izan dira, edo bestela ez-ikusiarena egin izan dute Udalek. Inoiz ez da asentamentu bat onartu eta gizartean integratzen saiatu. Hori da Astigarraga eta Hernaniko kasua, eta dokumentalak hori erakutsi nahi du, gizatalde kaltetu baten alde egindako ahalegin bat».
SOS Arrazakeriak salatu egin nahi du errumaniako ijituekiko dagoen irudi publiko ezkor eta estereotipoz betea, «eta etnia horretako pertsonen integrazioa bultzatu nahi dugu».
Balta txuria, balta berdea; zingira txuria, zingira berdea
Orain dela zortzi urte hasi zuen programa hau Astigarragako Udalak, eta zonalde horiei bi izen eman zitzaizkien: Balta txuria eta Balta berdea. Balta da aintzira edo zingira, errumanieraz. Hori hartu zuten dokumentalaren izen gisara, eta horri erantsi zioten Urumeako zurrumurrua, esanahiarengatik, «ibaiaren zurrumurrua eta dabiltzan zurrumurruekin jokatu nahi genuen», dio Anaitze Agirre dokumentaleko zuzendarietako batek.
17 lagunekin elkarrizketak
Dokumentalean 17 laguni egindako elkarrizketak erakusten dira: instituzioetako arduradunak, elkarte eta gizarte erakundeetako kideak, errumaniako ijitu jatorriko pertsonak, herritarrak... besteak beste ikusiko dira: Agustin Senperena Astigarragako udaltzain kaboa, Mikel Goenaga Astigarragako parrokoa edo Jose Luis Madrazo Jaurlaritzako gizarte politikarako zuzendari izana.