EMAITZAK berak erakusten duen moduan, final oso parekatua jokatu zuten Paul Ojuel hernaniarrak eta Galarza bizkaitarrak, Santxo eta Urruzolaren kontra. Leporaino bete zen Villabonako pelotalekua, Antxon Pebet torneoko finalaz gozatzeko gogoz. Aurkariak nagusi izan ziren, 22-20, azken momentuko huts egiteak medio.
Santxo eta Urruzola gogor hasi ziren, tanto bakoitzarekin asmatzen, dominatzen... eta 10-3 jarri ziren aurretik markagailuan. Hori izan zen lortutako alderik haundiena, Ojuel eta Galarzaren erreakzioa berehalakoa izan baitzen. Duten maila ematen hasi ziren: Galdakaoko atzelaria seguru ari zen atzeko koadroetan, nagusitzen, okasio askorekin; Ojuel ere aurkaria baino gehiago izan zen partidu erditik aurrera. Eta hala, tantu ederrak ikusi ziren, 22-20ra bitartean. Ojuelen pare bat hutsegitek Santxo eta Urruzolaren alde jarri zuten markagailua azken momentuan.
Hirutik bi irabazi,trinketean
Gipuzkoako Trinkete txapelketan zita garrantzitsuak zituzten Rodriguez, Lopez eta Esnaola pelotari hernaniarrek asteburuan.
Jubenil mailan, final laurdenetako partidua galdu zuen Suharri Rodriguezek Oiartzungo Salaberriaren kontra; 35-31. Rodriguezek zortea ez zuen lagun izan partiduko azken tantuetan eta sakearekin ere, ez zuen asmatu.
Senior mailan, final zortzirenetako partidua jokatu zuen Ander Lopezek. Nagusi izan zen hernaniarra, 30-20 Donostiako Fernandezi irabazita. Eskuak ez zituen nahi bezain ondo Lopezek, baina aurkaria baina gehiago izan zen. Irabazi eta gero, final laurdenetan da Lopez.
Eta azkenik, beste garaipen bat, senior mailan: Esnaolak 40-31 irabazi zuen Zendoiaren kontra. Erraz irabazi zuen. Mailaz ez jaisteko lehian ari da Esnaola.