Mahaiak, sofak, armairuak, garbigailuak... hau da, tamaina haundiko hondakinak astero jaso izan ditu orain arte Udalak. Urtarriletik aurrera, ordea, aldatu egingo da. Bi astetik behin egingo da bilketa. Ostegunetan bilduko dituzte hondakinak, baina etxetik asteazken gauean atera beharko dira. Eta ostegun honetan bertan hasiko dira bilketarekin. Beraz, urtarrilaren 2, 16 eta 30eko bezperako gauean atera ahal izango dira tamaina haundiko hondakinak, datorren hilabete honetan.
Deitu gabe,
300 euroko isuna
Hondakin horiek Udal langileek bildu ditzaten, behar beharrezkoa da aurretik Atez Ateko bulegora deitzea. Eta beraiek esandako lekuan utzi behar dira hondakinak. Atez Ateko bulegora deitu gabe hondakinak utziz gero, isuna jarriko du Udalak eta 300 eurora iritsi liteke. Honako telefonora deitu behar da: 900 840 090.
Bestalde, Udalak jakinarazi du, ez dituztela etxeko obretako hondakinak bilduko. Horiek Garbigunera eraman behar dira.
Garbigunera eramateko aukera, goiz eta arratsalde
Beste aukera bat ere bada hondakin haundiak etxetik ateratzeko. Norberak Garbigunera eraman ditzake asteko edozein egunetan eta goiz edo arratsaldean. Hernaniko Garbigunea Ibarluze poligonoan dago, arraun elkartearen ondoan. Honakoa da Garbigunearen ordutegia: astelehenetik ostiralera, 10:00-14:00 eta 16:00-19:00; larunbatetan, 10:00-15:00; igande eta jai egunetan, berriz, itxita.
Berrerabilpen zentroa, beste aukera bat
Hirugarren aukera bat ere bada tamaina haundiko hondakinak botatzeko. Hernaniko Berrerabilpen Zentrora eraman daitezke. Zentro hau, Nafar kalean dago, 19garren zenbakian. Tamaina dela eta, norberak ezin badu bertaraino eraman, beraiek pasatzen dira etxetik jasotzera, aurrez dendara deituz gero. Telefonoa, honakoa: 943 50 63 41. Berrerabilpen Zentroak ondoko ordutegia dauka: astelehenetik ostiralera, 09:30-13:30 eta 17:00-20:00; eta larunbatetan, 10:00-14:00.
Aipatutako hiru zerbitzuak dohainik dira.