aizpuru Farmaziak egingo ditu gaueko larrialdi guardiak urtarrilaren 1etik abenduaren 31ra. Latsunbeberri auzoko 11garren zenbakian dago farmazia, eta kontakturako telefonoa 943 33 60 77 da. Gaueko 22:00etan hasten da guardia farmaziaren turnoa eta goizeko 09:00ak bitarteko zerbitzua ematen du. Hamar urte dira Hernaniko farmaziak errotatu egiten direla, urte osoko gaueko guardiak kubritzeko. Turno horietan lanean aritzen direnak ordea, berdinak dira beti. Hiru kidek osatzen dute gaueko guardietako taldea eta bi hernaniarrak dira: Mar Santamaria, Marian Arbaizu eta Yolanda Caro.
Eguneko turnoa, txandan
Eguneko guardiak ordea, txandaka egiten dituzte Hernaniko, Urnietako eta Astigarragako farmaziek. 13:30-16:00 eta 19:30-22:00 bitarteko orduak kubritzen ditu eguneko guardiak.
Larrialdi gutxi
Karmele Aizpuru, Idoia Fernandez eta Itziar Mitxelenak daramate Aizpuru farmaziako martxa. Guardien inguruan galdetuta, Hernanin ez dela larrialdi askorik izaten dio Karmele Aizpuruk: «medikutik ateratakoan, lanetik etxera bidean... badira momentu horretan erosi behar dutenak, eta horretarako daude gehienbat guardiako farmaziak. Jendeak bietan bat aukeratuz gero, eguneko guardietara jotzen du. Gauetan ez da mugimendu askorik izaten, behar behar beharrezkoa besterik ez.»
Bi momentu,
aipatzekoak
Hamasei urte pasa dira Aizpuru farmazia zabaldu zutela, eta eboluzio honetan, bi momentu aipatzen ditu Karmele Aizpuruk: «lehendabizikoa, guardiekin zuzen zuzenean erlazionatuta. Guretzat, pausu haundia izan zen gaueko guardiak zentralizatzea; hau da, urte osoa farmazia batek egitea eta horretarako talde bat egotea. Eta bestea, berri berria baina oso ondo funtzionatzen ari dena: errezeta elektronikoa. Guztiontzat da erosoagoa eta eraginkorragoa».