TANTA bihurtu eta giza eskubideen, konponbidearen eta bakearen aldeko espazio amankomuna sortzea du helburu Tantaz Tanta ekimenak. Izenak berak dioen moduan, Euskal Herri osoko tantak elkartu, eta itsaso bihurtu nahi dute, indarrak elkartu, hain zuzen. Deialdia egina dute urtarrilaren 11n Bilbon, Giza eskubideak. Irtenbidea, Bakea. Euskal Presoak Euskal Herrira lemapean.
Aurretik, herriz herri, auzoz auzo ari dira tanta horiek elkartzen, eta Hernanin, larunbatean antolatu dute Tantaz Tanta Blai jaialdia. Kiroldegiko pelotalekuan elkartuko dira 19:30etatik aurrera hainbat sektoretako pertsonak. Euren aportazioa edo tanta ematea izango dute guztiek helburu, horien artean: Morau, Xabier Solano eta beste hainbat musikari, Ozenki abesbatza, Akelarrea, Bertso Eskola, txalapartariak, dantzariak, kirolariak... Bideo proiekzioak, antzerkia, parodiak, Paulinoren xoua... denetarik izango da, eta hernaniar guztiei deialdi berezia egin diete, egun horretan gerturatu, eta euren tanta emateko.
Hainbat sektoretako pertsonek egin dute bat Tantaz Tanta iniziatibarekin, «hamaika iturritik sortuak gara, desberdinak garenok itsaso berean elkartu gara, une historiko honek hala eskatzen duelako». Zazpi hernanir hauek ere, bat egin dute, gainerakoei animatuz:
Juan Martin Erdozia:
«Euskal presoak eta deportatuak, etxera!»
Xabier Iradi:
«Tantaz tanta, Hernanitik ere,
erreka sortuz»
Damian Pedrosa:
«Gure tantak
bihotzaren elkartasun taupadak dira»
Miren Gojenola:
«Tantaz tanta, busti gaitezen, tantaz tanta blaitu, Bilbo ozeano bihurtu arte!»
Jon Apaolaza:
«Ni ere tanta naiz!»
Txaro Untzilla:
«Beste tanta bat nahi dut izan, itsaso bihurtzeko»
Mikel Laskurain:
«Urtarrilaren 4an, egun ederra denok bustitzeko»
