Hernaniko jokalari ohien txanda bihar, ate irekietako azkeneko saioan

Sekulako arrakasta izan dute eskubaloi taldeak an­tolatutako ate irekien jar­du­naldiek. Hiru saio eginak dira dagoeneko, eta ehundik gora neska-mutil elkartu di­ra, eskubaloia ezagutu eta pro­batzeko gogoz. Izandako ha­rrera eta gero, azken saio bat antolatzea erabaki du eskubaloi taldeak. Orain ar­tekoak baino luzexeagoa eta bereziagoa izango da.

Hernaniko eskubaloiaren parte izan zirenekin saioa, bihar
Izen haundiko jokalari, tekniko eta epaileak pasa dira azken asteetan kiroldegitik. Azken saio honetan ordea, Hernaniko taldeak izan zuen eta oraindik mantentzen duen nortasuna erakutsi nahi diete neska-mutilei. Hori horrela, klubeko kide izan diren izen haundiak izango dira bihar, Kiroldegian: Maider Tolosa, Olatz Ibarzabal, Eli Igarriz, Juan Luis Gato, Alvaro Rezusta, Jon Mutiloa, Josetxo Re­dondo, Juan Luis Goikoe­txea...: «hauei eskerrak eman nahi dizkiegu, eta baita noizbait klubeko kide izan ziren guztiei ere».

Gazteak, lehendabizi
Berriak eta orain arteko ate irekietan ibilitako gazteak elkartuko dira bihar Kirol­de­gian. Hori horrela eta plus bat emateko gogoz, saio be­rezia antolatu dute bereziki 12 eta 14 urte bitarteko neska-mutilei zuzenduta. 10:00­e­tatik 11:30­etara izango da, eta ohiko entrenamenduaz gain, partidutxo bat jokatzekoak ere badira. Her­naniko eskubaloi taldeko jokalari ohiekin ariko dira, eta hauen laguntza eta esperientzia ja­soko dute, azken saio honetan.

Txikienen txanda, ondoren
Herriko txikienen txanda izango da ondoren. 11:30etatik 13:00etara. Jokoak eta bestelako teknika saioak jasoko dituzte neska-mutil hauek azken saio honetan.

«Gure lana egiteko modua ezagutzea nahi dugu»
Ate irekietako saio bat baina zerbait gehiago izatea nahi dute biharkoa. Hori horrela, eskubaloi taldetik diote, biharko helburua ez dela soilik eskubaloia ezagutaraztea eta neska-mutilek jolastea: «guraso, familia, lagun eta gerturatzen diren guztiek gure lan egiteko modua ezagutzea nahi dugu, gu ezagu­tzea, eta proiektua aurrera eramateko jarri dugun mimo guztia jaso eta ikustea».

Eskubaloi eskola martxan, urtarriletik aurrera
Orain arte egindako lan guztiak urtarriletik aurrera fruituak ematea aurreikusten du eskubaloi taldeak: «2014ko urtarrilean martxan izango da Hernaniko Eskubaloi Eskola. Eskola Kirolaren osagai banatu ezina izatea izango da gure helburu nagusia, eta era berean, gure klubeko etorkizuneko jokalariak sortuko dira bertatik».

Azken asteetan Kiroldegira gerturatu diren jokalariei, esker hitzak Eskubaloiak izan duen ha­rre­ra azpimarratu nahi dute taldetik, eta bide batez, go­goratu eta eskerrak eman, ate irekiak medio, Kiroldegitik pasa diren jokalari guztiei: «ate irekietako neska-mutil gehienek ez zituzten ezagu­tzen, baina pertsona guzti horiek ki­roldegira ekarri izana es­fortzu haundia izan da denontzat. Lerro hauen bi­tar­tez eskerrak eman nahi dizkiegu guztiei: Imanol Alvarez eta Martini, Bera Berako nesken taldeko eta Euskadiko selekzio absolutuko teknikoei; Susana Po­zasi, Hernani eta Bera Berako jokalari ohiari; David Rodri­guezi, Bidasoako jokalari ohia eta Europako txapeldunari; Julian Eskideri, Bi­da­soa, Her­nani, Egia eta Erein­tza­ko jokalari ohiari, eta azken honetako teknikoari; Carlos Guideri, Asobaleko epaile inter­n­a­zionalari; eta Nery Carla Al­ber­tori, palmares ikaragarria duen jokalariari, bes­teak beste, brontzea 2012­ko olinpiadetan, eta 2011ko Brasilgo mun­dialetan».