Hamasei urterekin bere ametsa egi bihurtu du Gaizka Marcote Paz hernaniarrak: Manga komiki bat kaleratzea. La melodia de los infiernos da lanaren izena, japoniarrez, Jigoko Senritsu. Momentuz, internetez erosi liteke, Amazonen eta Palibrio editorialaren web orrian.
«Naruko serieak engantxatu ninduen Manga komikira»
Marraztea betidanik gustatu izan zaio Gaizkari, baina Manga komikiena berri xamarra da. Naruko serieak piztu zion grina, orain oso gutxi, eta ordutik, ezin utzi: «marrazten hasi nintzen, lan sueltoak hasieran, eta gero istorio bat egin nezakeela konturatu nintzen. Amak egiten ari nintzen lanak ikusi zituen eta beti izan dut ondoan, laguntzeko prest».
Betiko komikien eta Mangen arteko aldeari dagokionean, Gaizkak dio istorioetan dagoela alde nabarmena: «komiki tradizionalak oso amerikanoak izan ohi dira, super heroiez josiak. Mangek publiko helduagoa dute, gai sakonagoak dituzte. Nire liburuan esaterako, istorio apokaliptiko bat kontatzen dut. Mundua kutsatzen duten monstruo asko daude istorioan, eta protagonistek erremedioa bilatzea dute helburu; lortu edo ez, bere burua salbatzea lortzen dute».
Manga liburuan beste berezitasunetako bat da atzekoz aurrera irakurtzen direla. Liburuaren azala atzean du, eta handik aurrera hasten da istorioa. Gainera, marrazki ia guztiak txuri beltzean izan ohi dira.
Edizioa, berak egina
Liburuaren kaleratzea Palabrio editorialaren bitartez egin du, Estatu Batuetan bizi duen amonak lagunduta. Edizio lan guztia ordea, Gaizkak berak egin du. Marrazki guztiak eskuz eginak dira, eta bera aritu da banaka eskaneatzen. Azaleko marrazkia ere berak egina da; eta liburuaren tamaina eta azalaren materiala ere, berak aukeratuak dira.
Aurreneko lana kalean da, eta orain, bigarrena osatzeko lanetan ari da Gaizka.