BMX parke bat edo frontoi txiki bat egitea, parte hartze prozesuko ondorio batzuk

Bukatu da kirol ins­ta­lazioei buruzko parte hartze prozesua, eta epe motzean egingo diren ekintzen artean dago BMX parke bat egitea, bizi­kle­tentzeko koskak di­tue­na, saltoak eta abar egi­teko. Frontoi txiki bat ere egin nahi da, oraingo fron­toiko graden azpian, eta auzolanean egitea baloratzen ari dira. Iturri gehiago ja­rri­ko dira kirol praktikak egi­ten diren le­kuetan (Tilose­tan, adibidez), eta komun publikoren bat ere jarri nahi da... Epe motzean eta luzean egin beha­rrekoak zehaztu dira, parte hartze prozesuan. Lau bilera egin dira. 33 lagun hasi eta 17k bukatu dute, eta parte har­tzea nahi adinakoa izan ez bada ere, oso inte­res­garria izan dela adierazi zu­ten ostiralean, Beñat Ame­na­bar eta Luis Intxaspek Go­ber­nu Taldearen izenean, Ima­nol Azkuek prozesua bi­de­ratu duen Elhuyarreko tek­ni­ka­riak, eta Garbiñe Tijerok parte hartzaileen izenean. Txosten osoa eskuratu nahi duenak kiroldegian eskatu dezake.

Parkeetan kirola egiteko makinak jarriko dira
Epe motzean egingo diren beste gauza batzuk ere aipatu zituzten ostiralean. Adine­koentzat, adibidez, parke eta leku publiko batzuetan maki­na bereziak jarriko dira ariketa fisikoa egiteko. Oinez ibiltzea gus­toko dutenentzat, ibilbide sa­reak gehiago markatuko dira, seinalizatu, eta mapak ere egingo dira. Ave Maria par­kean kirol praktikak egiteko zer jarri litekeen aztertuko da, adi­bi­dez, mahai tenisean jokatzeko mahaia jarriko da. Kiroldegiko sarrera nagu­sia, ataria, kirol espazio beza­la jarriko da, adibidez, luza­ketak egiteko panelak... Gazte talde batek propo­sa­tuta, BMX parkea jarriko du­te, eta oraingo Skate parke txikia egokitu egingo da. Skate parkeak, adibidez, erabilera haundia daukala adierazi zuten, eta txukundu bat emango zaio. Urumeako Gay Mur eraikinean pista libre egoten da arratsaldez eta aste­bu­ruetan, eta beste kirol batzuk egiteko lurra margotuko da. Horiek dira egingo diren ekintza batzuk, baina gehiago zehaztuta daude txoste­nean.

Foroak jarraitu egingo du
Parte hartze foroak atera duen lehendabiziko ondo­rioa izan da, foroak segi egin behar duela, ikusi litezkeen txoste­na­ri jarraipena egin eta mo­mentuero ikusten diren be­ha­rrak zerrendatzen joate­ko. Ki­rolgune Foroa deituko diote. Prozesuaren ondorengo txostenean, egingarrienak di­ren ekintzak au­rrena jarri dira. Horietako asko 2014an egin­go dira, eta horretarako diru partida bat gordeta dau­ka Udalak. Gainerakoak, ze­rren­dan geratu dira, au­rrera begira egiteko.

Azpimarratzeko hiru puntu
Gobernu Taldeak dioenez, egindako prozesu guztiaren ondoren, hiru puntu behintzat azpimarratzekoak dira. Bate­tik, prozesuan kirola ez dela zentzu klasikoan ulertu, bai­zik askoz zentzu zabala­goan. Bestetik, hor ikusi dela Her­na­nin kirolak benetan sekulako pixua daukala. Eta azkenik, jendeak azaldu duen dispo­si­zio ona parte hartzeko, eta lau goizetan lanean aritzeko, prozesu honetan.