Porrotei buelta
emateko gogoz
Aurrean talde gogorra izango du gaur Hernanik, baina horrek ez dio dena emateko ausardia eta gogoa kenduko. Azken lau partiduetan izandako joera ezkorrari buelta ematateko premia dute hirukoloreek. Ez dute lan erraza, baina klubetik azaldu duten moduan, ez da ezinezkoa izango. Pepe Rojo zelaian, VRAC taldearen kontra jokatutako partiduan, hortzak erakutsi zizkion Hernanik, eta gaurkoan, talde bera zelairatuko dute Landaren.
VRAC: ondo
egituratutako taldea
Ligako talde indartsuenetakoa da VRAC gaztelarra. Ondo egituratutako taldea da, eta hori da, guztiaren klabeetako bat. Jokoa ere, ikusgarria dute.
Aurreko lerroetan, aipatzekoak: hirugarren lerroan, Gavidi eta Newton; bigarren lerroan, Molina; eta aurrenekoan, Barnes. Lehenengo lerro hori indartzeko gainera, Zeelanda Berritik Scott Vessey harroina fitxatu dute, orain arte Northland taldean aritutakoa. Maila ikaragarria hortaz, aurreko lerroetan.
Eta atzeko lerroei dagokienean, zer esanik ez: Griffiths, Muller anaiak, Sergio Fernandez edo Perico Martin haundiak, esaterako. Ligako azkarrenak izango dira ziurrenik, eta baloia gutxik bezala mugitzen dute
Azken partiduetan ez du nahi besteko maila eman VRAC taldeak, eta horrek galduarazi die inork gutxik zalantzan jartzen zuen lidertza. Valladolideko derbia galdu eta gero, nekez irabazi zuten Sevillan, joan den astean. Bigarren itzulia beste jarrera batekin hasteko asmoz iritsi dira gaur Hernanira eta horrek are aurkari arriskutsuagoa egiten du.
Landarera jaisteko deia
Gaurkoan irabazten duenak irabazita, espektakulua ziurtatua izango da Landaren. Santo Tomas eguna izaki, klubetik diote, ez dela egunik aproposena Landarera jaisteko. Hori horrela, deialdi berezia egin diete zaleei, Hernanik behar duen bultzada ematera inguratzeko.