Santo Tomas Eguna da gaur eta herriko hainbat txokotan festa antolatu dute. Egunak merezi duen bezala, txistorrarik ez da faltako.
Txistorra postua gaur, eta Olentzero lehiaketa bihar, Lizeagan
Lizeagako Gibelalde auzo elkarteak postua jarriko du 18:30etatik 21:00etara. Txistorra jateko aukera ederra izango da Victor Hugo kaleko 4garren zenbakiaren plazoletan.
Bestalde, bihar, Olentzero-panpinen lehiaketa izango da. Maketak 12:00ak baino lehen utzi behar dira elkartearen egoitzan (Larramendi 11, behea). Ondoren, erakusketan jarriko dira 12:00etatik 13:00etara.
Egun osoko festa, Orkolagan
Anboto tabernak ere eguna ospatzeko jaia antolatu du Orkolagan. 12:00etatik aurrera haur jolasak izango dira, Toka Txapelketa, sokatira eta txingak. Sagardo eta txistorra probaketa ere izango da gerturatzen den guztiarentzat. Ondoren, bazkaria eta Gabonetako Mus Txapelketa berezia antolatu dute. 16:00etan izango da hori. Eta eguna bukatzeko, kontzertuak: Vomito, Krisis eta No Hope.
Sagastialden, Goiz Eguzkin, Gazte Txokoan eta Goiz Argin
Goiz Eguzkiko kideek urtero bezala ospatuko dute Santo Tomas Eguna. 11:00etatik aurrera, txistor jatea izango dute eta udazkeneko karta joko eta herri jolasetako sari banaketa ere bai.
Sagastialde elkarteak 19:00etan egingo du txistor jatea eta bere bazkide eta lagun guztiak gonbidatzen ditu bertara azaltzeko. Eta herri osoari jai zoriontsuak opa dizkio.
Gazte Txokoan, berriz, gaztetxoentzako izango da txistorrada.
Eta Goiz Argi tabernan ere txistorra pintxoak banatuko dituzte 19:00etatik aurrera, tragoaren truke. Horrez gain, trikitilariek taberna eta kalea girotuko dute. Arratsalde eta gau partean, gainera, euskal musika jarriko dute.
‘Libre’ zapi naranjak janzteko deia
Libre dinamikaren barruan, herritarrei dei egiten diete zapi naranjarekin ibiltzeko Gabonetan. Eta gaur, Garin kanpoan, txistorraz gain, zapiak egongo dira salgai.
Urnietan, sagar tarta lehiaketa
Urnietan arratsaldeko festa antolatu dute eta besteak beste, sagar tarta lehiaketa. Parte hartzea irekia da eta tartak 16:00etatik 19:00etara aurkeztu behar dira udaletxeko arkupetan. Parte hartzaile bakoitzak txanpain botila bana jasoko du eta sariak izango dira aurreneko bi sailkatuentzat. Eta 18:00etatik aurrera izango dira: txistor jatea, gaztain erreak, taloak, sagardo txapelketa, saskiaren zozketa...