30,8 milioiko aurrekontua izango du Hernanik datorren urtean, %2,3 gehiago

2014 urteko udal aurrekontuen proposamena onartu zuen asteartean, Plenoak. 30.813.312 euroko aurrekontua izango du Hernanik datorren urtean, aurten baino %2,3 gehiago; 713.829 euro gehiago. Gobernu Taldearen botoekin onartu ziren; oposizioko hiru alderdiek (PSE-EE, EAJ-PNV eta H1!) kontra bozkatu zuten. Osoko zuzenketak aurkeztu dituzte.
Orain, aurrekontuak jendaurrean ikusgai daude eta 15 laneguneko epea dago aurrekontuak aztertzeko eta erreklamazioak egiteko. (Gaiari buruzko informazio zabalagoa emango du Kronikak asteburuan).

Floridan 308 etxe, eta guztiak babes publikoren bat dutenak
Lankidetzarako hirigintza hi­tzarmen bat ere onartu zuten Plenoan. Hitzarmena, Udala­ren eta Diputazioaren Itten Herriekin Lan Egiten S.A. erakundearen artekoa da, Flori­da­ko urbanizazio planari dago­kiona. 2006an, Etorlurre­kin (gaur egun, Itten) hitzar­tu zuen Udalak AMR Floridatik atera eta auzoan hirigintza proiektu bat aurrera eramatea. Proiektu hori ez dela bideragarria ikusi du Udalak eta hitzarmen berria adostu dute.
Hitzarmen berriaren arabera, 332 etxebizitza egin beharrean, 308 etxebizitza egingo dira Floridan. Lehen, %40 libre­ak ziren, %40 kontzertatuak eta %20 babes ofizialekoak. Orain, %100ean babes publikoren bat duten etxebizi­tzak izango dira eta alokairura bideratuko dira asko. Horrez gain, etxebizitza guztien erdiak hernaniarrentzat izango dira, hasieran baino gehiago. Orde­na­zio urbanistikoa hobetzen saiatu direla azaldu zuen Luis Intxauspe alkateak eta espazio ireki gehiago izango da. Bestalde, Udalarentzat 15 etxebizitza izan beharrean, 4 izango dira eta Landare-toki Uda­laren jabetzara pasa beharrean, Diputazioak utzi egingo dio 30 urteko erabilerarako eta gerora Udalarena izateko aukera bil­tzen da. Hasierako hitzarmenean bezalaxe, 600 m2ko lokal bat Udalarentzat izango da.

Lege berriarekin, konpetentzia gutxiago
Udaleko Enpresa Batzordeak (LAB-ELA) aurkeztutako mo­zioa ere onartu zen asteartean, Espainiako Kongresuak gaur onartuko duen Toki administrazioaren erreformarako legearen kontrakoa. Puntuka bozkatu zuten eta aurreneko eta azken puntua aho batez onartu ziren; bigarrenean eta hirugarrenean, sozialistak abstenitu egin ziren. Hori horrela, honakoa onartu du Udalak:
«1. Lege-proiektua errefusatzen dugu, Udalen eta toki administrazioen konpetentziak eta finantza-baliabideak mu­rriz­ten dituelako, zerbitzu pu­blikoak herritarrengandik urrun­­duz; zerbitzu publikoen merkantilizazioa bultzatzen duelako; eta langileon baldin­tzak jo mugan jartzen dituelako.
2. Euskal Herriko herritarron beharretara egokitutako instituzio-antolaketa erabakitzeko, eskubidea aldarrikatzen dugu.
3. Euskal Herriko langile guztien negoziazio-eskubidea defendatzen dugu; Lan Harre­manetarako Euskal Esparrua funtsezkoa izanik.
4. Udalak ahal duen neurrian lege hau ez aplikatzeko konpromisoa hartzen du».
Honen harira, kontzentrazioa egingo dute gaur Udal langile eta agintariek, 12:45etatik 13:15etara, udaletxe aurrean.

«Egoera larria da, ikasleak Agustin Iturriagan pilatzen dira»
Hernanin, Bigarren Hezkun­tzako eskolarizatze beharrei erantzuteko (bateratzea zela eta), eraikin berri bat egiteko konpromisoa hartu zuen Eusko Jaurlaritzako Hezkun­tza Administrazioak. Orain gutxi, bertan behera uzteko erabakia hartu duela jakin da eta erabaki horren aurkako mozioa aurkeztu zuen Hernani BHIko Eskola Kon­tseiluak astear­tean. «Datak bete ez badira ere, azken aldian proiek­tua martxan zegoela pentsatzen genuen eta jakin dugu, bertan behera uztea erabaki dutela oraingoz, eskola komunitateari inolako azalpenik eman gabe. Egoera larria da. DBH 3-4 eta Batxilergoko ikasleak Agustin Iturriagan pilatzen dira eta eragin kaltegarria du», azaldu zuten.
Mozioarekin aho batez onartu zuen Plenoak, honakoa: Hernaniko Udalak harreman instituzionala bideratzea Jaur­laritzarekin, Hezkuntza Sailak 2014 urtean diru partida bat eman dezan Hernani BHIko eraikin berria egiteko eta 2014an eraikinaren adjudikazio publikoaren fasea gauza­tzeko. Eta Udalaren laguntza eta bultzada ziurtatzea.

Eusko Jaurlaritzak emandako finantzaketa, %33koa izatea
Musika Eskolako ordezkariek ere mozio bat aurkeztu zuten Plenoan. 2013ko otsailaren 28an Legebiltzarrak aho batez onartu zuen musika eskolentzat %33ko finantzaketa egonkorra lortzeko ekintza-plana ezartzea, baina gaur egun, Eusko Jaurlaritzak emandako finantzaketa, %14koa da soilik. Hori horrela, Hernani Musika Eskolako taldeak Plenoari eskatu zion, mo­zioa onartzeko eta Eusko Jaurlaritzako Hezkuntza, Hiz­kun­tza Politika eta Kultura Sailari eskatzeko, Legebiltza­rrak aho batez onartutako transakzio-zuzenketa betetzea, musika eskolentzat %33ko finantzaketa egonkorra lortzeko asmotan. Aho batez onartu zen.

ITVko gatazka konpontzeko, erakundeen babesa
Urnieta eta Irungo ITV-IATko langileek 160 egunetik gora da­ramazkite greban, enpresak lan hitzarmena berritu diezaien bo­rrokan. TÜV Rheinland Ibe­rica S.A. enpresak daramaki zerbi­tzua Eusko Jaurlaritzak ezarritako kontzesio kontratua dela eta. Hori horrela, langileek erakundeen babesa eskatu dute, tar­tean Hernaniko Udalarena, Eusko Jaurlaritzak esku hartu dezan eta gatazka bukatu dadin. Hona­koa onartu zuen Plenoak, aho batez: Jaurlaritzari eskatzea, ahal duen guztia egiteko lehenbialehen TÜV Rheinland Iberia S.A. enpresa kontzesiodunarekin, gatazka konpontzeko. Eta neurriak hartzea, EAEko gidariek ITV zentrua modu librean aukeratzeko eskubidea izan dezaten, kalitatezko zerbitzua jasoz.