Ataramiñe izeneko koadernoa urtero ateratzen da, euskal errepresaliatu politikoek egindako literatur lanez osatua. Aurten 13garren alea kaleratu dute, eta Hernanin ikusteko aukera izango da, gaur, 19:00etatik aurrera, Garinen. Joxe Karlos Apeztegiak egingo du aurkezpena, Hernanin bizi den iruñarrak, eta besteak beste azalduko du zer den Ataramiñe, eta aurtengo aleak zer biltzen dituen.
Literatura, poesia, bertsoak... eta gehiago
Era guztietako lan literarioak biltzen ditu koaderno honek. Gehiena presoen kartzeletako egoerari buruzkoak dira, baina badira bestelako lanak ere. Poesia, bertsoak, marrazkia... denetik dauka koadernoak. Izaera kolektiboa dauka koadernoak, protagonista batek baino gehiagok egina delako. Euskeraz idazten dute gehienek, baina badira gaztelerazko testuak ere, eta horrez gain, bada bat, berezia, galegoz idatzia dagoelako. Hori guztia marrazki eta komikiez lagunduta dago, eta egileen izenak ere biltzen dira bertan. Zein eta ze espetxetan dagoen...
Ale batzuk salgai izango dira Garinen bertan
Aurkezpena egingo duen kideak berak idatzitako testuak ere baditu koaderno honek, eta aukera izango da bertan eskuratzeko, ale batzuk ekarriko baitituzte aurkezpenera. Arratsaldeko 19:00etan hasita, Garin tabernan.