Beharrezkoak ziren lau puntuek ihes egin zuten atzo Landaretik. Aukera ederra zuen atzo Hernanik Vigoren kontra irabaziz gero, sailkapenean gora egin eta bigarren bueltari ekiteko nahikoa puntu lortuta. Ez zen hala izan, 26-31 galdu baitzuten. Hala ere, partidua orekatua joan zen, markagailua batzuren eta bestearen alde izan baitzen 80garren minutura arte.
Atsedenaldian, berdinketa
Hasi bezain azkar jarri ziren vigotarrak aurretik, Urruburok gauzatutako zigor kolpea medio. Etxekoek ez zituzten minutu asko behar izan erantzuteko eta Genuaren bitartez berdinketa lortu zuten.
Galiziarrek 17garren minutuan egin zuten aurreneko entsaioa. Genuaren beste gauzaketa bat iritsi zen segidan. Atsedenaldirako minutu gutxiren faltan, hernaniarrek baloia zabaldu, eta Manex Casadoren eskutik etorri zen entsaioa. Hala, 13-13ko berdinketarekin joan ziren atsedenaldira.
Bigarren zatia aurrenekoaren pareko hasi zen, vigotarren entsaioarekin. Zelaian jokalari bat gehiago zuten galiziarrek momentu horretan, eta ondo aprobetxatu ere, bigarren entsaioa egin baitzuten. Hernaniarrek ez zuten etsi, eta bigarren zatiaren erdialdera etorri zen trikoloreen erasoa. Jokorik onena erakutsi zuten minutu horietan, eta Otaegiren entsaioak borobildu zuen guztia. Aukera bazen oraindik, baina vigoterren bi zigor kolpek ekarri zuten partiduaren azkena: «epaileak, oso modu eztabaidagarrian, etxekoen aurka bi zigor kolpe pitatu zituen, eta Simon lapurtarrak biak gauzatu zituen» zioten errugbi elkartetik.
Hernaniarrek, dena emateko bidean, entsaio berri bat lortu zuten Jon Olanoren eskutik. Baina denbora agortua zen eta aurkariak ondo itxi ziren atzoko lerroetan, emaitzari euste aldera. Hernanik defentsarako bonus puntua lortu zuen.