Asteartean Udaleko areto nagusian izango den Plenoak bozkatuko ditu 2014ko aurrekontuak. Alderdi Sozialistaren ustez, aurrekontu partidistak dira, transparentzia gutxikoak. Kronikara bidalitako prentsa ohar bidez, PSE-EEk jakinarazi du, aurrekontuei osoko zuzenketa egin diela. Hori horrela, kontra bozkatuko dutela aurreratu dute. Puntuz puntu, argibideak eman dituzte.
«Hernani kaltetua izan da
Atez Atekoarekin»
Alderdi sozialista kritiko agertzen da aurrekontuan Atez Atekorako azaltzen den diru partidarekin: «Urte honetan 1.583.000euro kostako da Atez Atekoa; eta horri gehitu behar zaio San Markori ordaindu behar zaizkion 235.000 euroak. Beraz, guztira 1.818.000 euro behar dira. Hernani kaltetua izan da sistema aldaketarekin. Atez atekoa jarri aurreko urtean, 2009an, hondakinak jasotzeko aurrekontua 467.657 eurokoa zen. Ez dugu ahaztu behar, herritarrek euren poltsikoetatik ordaintzen dutela kostu hori. Eta oraindik erraustegia ixtearen kalte ordaina eman behar da. Hernaniri 264.000 euro dagozkio, hondakin tasa bidez ordainduko direnak».
«Langile gastua gutxitu liteke Udaleko langileekin»
Bilduk langile gastuetarako egiten duen aurreikuspena ere kritikatu du PSE-EEk prentsa oharrean. Dio 103.785 euro aurreikusten direla Gobernu Taldeko konfiantzazko langileentzako: «gastu hori gutxitu litekeela uste dugu, Udaleko langile propioak erabilita».
«Partidak, destinorik gabe»
Aurrekontuetan transparentzia falta dagoela dio PSE-EEk ohar hasieratik. Azalpenean gehitu dute, destinorik gabeko partidak daudela aurrekontuan: «439.389 eurok ez dute destinorik. Aurrekontuen arabera, 340.789 euro gastu ezberdinetarako dira, 65.100 euro lan teknikoetarako, eta 33.500 kontratu ezberdinetarako».
«Bere boto emaileentzako
egiten du lana Bilduk»
Hernaniar guztientzako lan egin beharrean, Bilduk bere boto emaileentzako egiten duela lan dio alderdi sozialistak: «120.000 euro aurreikusi dituzte, laguntza zuzen gisa, bere kausarako: 15.000 Udalbiltzarako; edo 90.000 euskal presoen familientzako. Lotsagarria iruditzen zaigu dirua modu partidistan erabiltzea».
«Inbertsioetarako, 2.601.399 euro besterik ez»
Inbertsioetarako diru gutxi aurreikusten dela ere kritikatu du PSE-EEk: «2.601.399 euro aurreikusten ditu. Harrigarria da, 110.000 euro Txillida pasealekua berritzeko aurreikusten dituela. Guk eskatzen diogu trafiko aldaketak berriro aztertzeko, agerian geratu baita eraginkortasun falta. Azkenik, Karabeleko auzorako prebisio falta ere salatu nahi dugu. Hasiera batean uholdeen kontrako lezoia egiteko partida aurreikusten zen, eta kendu egin dute».