Preso eta iheslari izan direnei laguntzeko Harrera Elkartea sortu da. Hernanin bertan taldea jarri nahi dute martxan, eta nondik norakoak azaltzeko hitzaldia antolatu dute gaur. Jon Ugarte eta Juankar Ioldik emango dute, Udaleko areto nagusian, arratsaldeko 19:30etan.
Taldea, herritarrei irekia
Harrera elkarteak urte eta erdiko ibilbidea du, eta preso ohien iniziatibaz sortu zen; gogoratu nahi dute ordea, herritar guztiei dagoela irekia. Asmo eta eginkizun nagusia da, preso eta iheslari izan direnei laguntzea gizartean egokitzeko sortzen zaizkien arazoekin; zailtasunak bideratzen laguntzea, alegia. Aldaketak izaten dira arazo nagusia, batetik preso bakoitzak bere buruarekiko izan dituen aldaketak; eta bestetik, gizarteak bere garapenean izan dituenak.