Madrilen izan da asteburuan Jon Ansorena txistulari hernaniarra, Certamen Nacional de Interpretación Intercentros `Melómano´ txapelketan. Musikeneko ordezkari gisa joan zen, beste lau ikaslerekin batera. Harridura punttuarekin eta ilusionatua ekin zion bideari Ansorenak, aurreneko aldia baitzen, txistuaren gisako instrumentu batek halako txapelketan parte hartzen zuela. Larunbatean bertan jo zuten Musikeneko bost musikariek, eta ez zuten finalerako pasea lortu. Hori bai, esperientzia gisa, ikaragarria izan zela dio Ansorenak: «esperientzia berria izan da eta gustura nago emandako mailarekin. Partitura moderno eta kontenporaneoak jo nituen eta lan txukuna egin nuela uste dut. Txistulari txapelketetan hartu izan dut parte, baina hemen pianoa, biolina, txeloa jotzen zuten musikariak zeuden, maila ikaragarrikoak... Igandeko finala ikusi besterik ez zegoen...»
Notizi ona, txistuarentzat
Publikoak erreakzio berezirik izan ez bazuen ere, antolakuntzakoak hasieratik interesatu ziren txistuagatik: «segituan gerturatu ziren guregana; halako txapelketetan txistua bezalako instrumentu tradizionalik ez zela ezagutu zioten... Txistuarentzat aurrerapausu ona izan dela uste dut» .