Gaur irabazita, Binakako Txapelketa haundian aurrera egiteko aukera izango dute Barrenetxea IVak eta Juaristik. Finalerdietako partidua jokatuko dute eta aurrean, aurkari ezagunak: Uterga eta Ion. Bueltako partidua izango da eta aurrekoa galduta, irabazi beste aukerarik ez dute Barrenetxea IVak eta Juaristik. Bitan neurtu dituzte indarrak txapelketa berean, Uterga eta Ionen kontra; eta bietan ezin. Endika Barrenetxeak, azken okasio honi heldu nahi dio: «aukera dagoen bitartean, dena ematera aterako gara. Aurreko bietan galdu egin dugu, baina Juaristi eta biok badakigu irabazi dezakegula». Gaurko finalerdia irabaziz gero, datorren larunbatean jokatuko da desenpatea; eta final haundia, abenduaren 21ean.
Txapelketarekin, gustora
Joan den urtean txapela irabazi eta gero, faborito gisa hasi zuten txapelketa Barrenetxea IVak eta Juaristik. Finalerako pasea lortu aurretik, gustora dira orain arte egindako ibilbidearekin: «ligaxkako ia partidu guztiak irabazi ditugu, eta orain arte egindakoarekin pozik gaude. Jon eta Utergarekin egin dugu topo azken fase honetan, eta gu baino hobeto daude. Juaristirekin ondo konpenetratzen naiz, eta oraindik aukera badugula uste dut. Gustora gaude».
Gipuzkoako jokalari onena izateko, hautagaia
Profesionalki urte inportanteak izan dira azken hauek
Endika Barrenetxearentzat. Gipuzkoako jokalari onena izateko hautagai aukera dute orain, eta ilusio haundiarekin jaso du notizia: «pelota mundutik ni aukeratu izana haundia da; irabazi gabe ere, nahiko sari bada niretzat. Gainera, aipatzekoa da esku pelota mundutik haratago joan izana, eta erremonte jokalari bat aukeratu izana».
Barrenetxea herritarrek bozkatzeko: www.gipuzkoakirolak.net/urtekokirolaria_bozkatu.php.