Bilduk erraustegiaren inguruan izan duen gestioa oso txarra izan dela kritikatu du Hernaniko PSE-EEk. Eta gaineratu du, ondorioek herritarrengan eragingo dutela. «Bilduren Diputazioak eta erraustegia egiteko ardura zuten konstruktoren arteko akordioak, 13.200.000 euroko kalte ordaina biltzen du, hau da, lehengo bi mila berrehun milioi pezeta baino gehiago. Zubietako proiektua bertan behera uzteak ondorio kaltegarriak izango ditu hernaniarrentzat». Hala azaldu du: «Kopuru horretatik, Hernanik 264.000 euro ordaindu beharko ditu, ia 44 milioi pezeta, eta ingurumen diputatuak (Bildu) esan duen bezala, hondakinen tasaren bidez ordainduko da. Hau da, Hernaniko herritar bakoitzak ordainduko du».
«EAJ-PNVk ere Bilduk bezainbeste ardura dauka»
Sozialistek diote, Gipuzkoak egun, ez duela irteerarik hondakinen arazoaren konponbidea erabat geldituta dagoelako eta milioiak kobratuko dituzten konstruktorei erantzun behar dielako. «Besterik gabe, hutsaren hurrengoa egiteagatik. Eta dena Bilduri eskerrak eta EAJ-PNVren erruagatik», azpimarratu dute.
«EAJ-PNVk Bilduk bezainbeste ardura dauka edo gehiago. Gertatzen ari denak zerikusi zuzena dauka beraiekin. Guztia zehaztasunez kalkulatua dago. Jeltzaleek utzi egin diote Bilduri lurraldea gobernatzen, nahiz eta sozialistek eskua luzatu behin baino gehiagotan. Argi dago bi alderdi hauen estrategien atzean, interes elektoralak daudela eta ez Bilduk, ez EAJ-PNVk, ez dute herritarrengan pentsatzen ezta segundo bakar batean ere», gaineratu dute. «Konstruktorei aldez aurretik iritsi zaie abenduaren 22a. Herritarrei, berriz, ikatz beltza, izan ere, bai Bilduk bai EAJ-PNVk zigortzea erabaki dute aukera duten guztietan».