Euskararen Nazioarteko Eguna da gaur eta herriko ikastetxeetan hainbat ekintza antolatu dituzte. Udalean ere ospakizun eguna dute eta Udal eraikinak itxita egongo dira; baita Kiroldegia ere. Bestalde, jakinarazi dute, abenduaren 6an, zerbitzu guztiak lanean izango direla, Udal langileentzako lan eguna izanik.
Erakusketa Biterin
Egun hauetan, Euskararen egunaK egitasmoa antolatu dute herriko talde desberdinek eta Euskerari buruzko erakusketa jarria dago Biterin, atzotik. Ikastetxeetako ikasleek euskeraren inguruan egindako lanak daude ikusgai. Ostegunera arte izango dira ikusteko aukera 10:00etatik 12:00etara eta 17:00etatik 20:00etara. Gaur itxita egongo dira Udal eraikinak, eta baita Biteri ere. Hala ere, aldameneko atea ireki egingo dute, eta erakusketa ikusteko aukera izango da.
Mintzodromoa, ostegunean
Mintzodromoa izango da ostegunean, Biterin (eguraldi txarrarekin, Atsegindegin). Bi saio izango dira: 10:00etan eta 18:00etan. Ostiralean, berriz, kale antzerkia antolatu dute eta euskeraren aldeko topa.
Sera: «Euskeraz dakitenek erabiltzen badute, inguratzen ari direnak motibatu egiten dira»
Euskerak Hernanin ze bide egin duen azaldu zuten igandean tour linguistikoan, eta besteak beste, euskera erabiltzearen garrantziaz aritu ziren. Adibidez, Serak adierazi zuenez, bera 11 urterekin etorri zen Hernanira, erabat giro erdaldunean bizitu zen, eta Institutuan hasi zen euskal mundua zer zen pixka bat ikusten eta horra inguratzen. Euskeraz ikasteko prozesuari buruz esan zuen, berarentzat oso garrantzitsua dela dakitenek hitz egitea. «Mundu horretara inguratu nahi duenarentzat, euskeraz entzutea bakarrik oso motibagarria da».
Etorkinen ahalegina
Geldialdiak eginez egin zuten euskeraren historia txiki bat. Hernani euskeraz bizi zen orain dela 100 urte, adibidez. Foruak kendu izanak gainera jendea euskeraren alde jartzea ekarri zuen eta loraldia bizitu zuen. Gero Gerra Zibilak dena frenatu zuen eta horren ostean euskera debekatu eta erabat erdaldundu zen Hernani.
Geroago, 60-70ko hamarkadetan jendetza haundia etorri zen Hernanira, eta are eta gehiago egin zen erdara kaleko hizkuntza. Franko hil eta ondoren hasi zen beste berpizkunde bat euskerarentzat, eta hor kanpoko zein bertako aritu ziren lanean, batzuk erakusten eta besteak ikasten. Joanjo Uriak azpimarratu zuen etorkinen meritua. «Nik ikasi nuen haiek ere beren herrietan gorriak ikusita etorri zirela hona, eta hemen pixkanaka integratzen saiatu egin ziren asko. Hori estimatzekoa da».
Urko Apaolazak egin zituen historiako aipamenak, Pepi eta Jone Errazkin aritu ziren hezkuntzari buruz hizketan, Xabier Iriartek ere hitz egin zuen... Trikitixa soinuarekin herrian barrena goiz pasa polita egin zuten, Joxe Luis Urdangarinek gidatuta.