Lizeaga auzoko bidegorria martxan izango da datorren astetik aurrera. Pintaketa lanak besterik ez dira geratzen eta aurreikusitakoaren arabera, asteartean bukatuko dituzte lanak (eguraldiaren arabera izango da).
Urumeako bidegurutzea
itxita, bihar
Bihar eta asteartean egingo dituzte pintaketa lanak eta ondorioz, hainbat kale itxita egongo dira eta trafikoan ere aldaketak izango dira.
Bihar, Lizeaga kaleko lanak bukatuko dituzte eta Elkano-Urumea-Izpizuako oinezkoen pasabideak margotuko dituzte. Izpizua kalea moztuko da eta Nafar kaleko irteera, Izpizua jaitsiz egingo da. Txirritatik dijoaztenek Urbietara jo beharko dute. Sandiusterri eta Txantxillatik dijoaztenek, berriz, Elkanotik behera hartu beharko dute, Urumeako bidegurutzea itxita mantenduko baita.
Lizeaga eta Atzieta itxita, asteartean
Asteartean, Izpizua kaleko pintaketa lanak egingo dira eta baita udaletxe atzeko bidegurutzekoak ere. Izpizua kalea moztuta mantenduko da, Nafar kalekoak Izpizuatik jaitsi daitezen baimenduz eta Txirritatik dijoaztenei Urbieta kalera joateko aukera emanez.
Udaletxe atzeko bidegurutzeari dagokionean, Larramendi kaleko trafikoa Elkanora bideratuko da, eta Lizeaga kalea eta Atzieta itxita mantenduko dira. Lanak bukatu orduko, ohiko norabideak erabili ahal izango dira.
Instituturaino
Lizeagako bidegorria, Hernaniko bidegorri sarearen zati bat izango da eta Institutuko ikasleen joan-etorriari erantzungo dio, besteak beste. Elkano eta Izpizua kaleek bat egiten duten lekutik hasiko da eta Tellerigaingo autobus geltokiraino iritsiko da. Bertan, 60 bizikletentzako aparkalekua izango da. Ezker aldetik joango da bidegorria. Zenbait tokitan, Institutu aldera joateko norantzan, kotxeekin konpartituko da bidea, hau da, koexistentziako guneak izango dira. Udaletxe parean eta Lizeaga kaleko hasierako zatian izango da hori. Gainontzean, igotzeko eta jaisteko bi norabide izango ditu bidegorriak.
Bidegorriaren eraginez, bidearen ezker aldeko hainbat aparkaleku kendu egin dira: Tiloseta parean daudenak, Paradoreraino daudenak eta Paradore bukaeratik aurrerakoak. Izan ere, Paradorean, barrutik doa bidegorria eta bertako aparkalekuak ez dira kendu. Horrez gain, Lizeaga kale hasieran eskubitara dauden aparkalekuak bateria motakoak izatetik, lineakoak izatera pasako dira.
Bizikletentzako aparkalekua, Tellerigainen
Bidegorria Tellerigaingo autobus geltokian bukatzen da eta haren ondoan bizikletentzako aparkalekua egiten ari dira. 60 bizikletentzako lekua izango du.
Metalezko estruktura izango du aparkalekuak eta tapatua izango da, polikarbonatozko materialarekin. 12,50 x 7,50 metro inguruko zabalera izango du. Barruan, bizikletak aparkatzeko bi ilara jarriko dira. Edozein herritarrek izango du erabiltzeko aukera.