`Baietz gurean!´ Buruntzaldeko herrietako 10 langiletik gorako enpresei zuzendutako egitasmoa da. 2010etik Buruntzaldeko Udalen asmoa da ahalik eta enpresa gehien jartzea euskararen erabilera normalizatzeko bidean, eta horretarako, helburu instrumental batez baliatzea erabaki dute, Hizkuntza Politikarako Sailburuordetzak ematen duen ziurtagirietakoren bat lortzeko bidean enpresak jartzea, eta ibilbide horretan diruz laguntzea. Buruntzaldeko udalek duten helburua da, Bikain ziurtagiria erreferente hartuta, euskararen erabilera normalizatzeko bidera erakartzea enpresak, horretarako aurrerapausoak diruz lagunduz. Ekimen honetan parte hartzea erabakitzen duten enpresei azterketa bat egiten die enpresa aholkulariak egoera linguistikoa zein den jakiteko. Horretarako, HPSk `Lan Hitz´ programaren barruan definituta duen Erreferentzia Marko Estandarra erabiltzen du. 0-1000 puntuko tartean neurtuko da egoera. Enpresa aholkulariak txostena egingo du zehaztuz neurketaren emaitza eta enpresa horrek hurbilen duen Bikain Ziurtagirirako bidean egin beharrekoak. Bide horretan, 100 puntuko salto bakoitzeko jasoko dute diru saria Udalaren eskutik. Hasierako puntuak gehiago sarituko dira: 0-500 tartean 700 euro salto bakoitzeko, 501-800 artean 500 euro, eta 801-1000 artean 300 euro. Enpresak parte hartzea erabakitzen duenean, urte beteko hitzarmena sinatzen du Udalarekin, luzatzeko aukerarekin, eta hitzarmen horretan jasoko da, besteak beste, udalak enpresari eman diezaiokeen dirulaguntzaren inguruko informazioa.
2004tik lanean
Buruntzaldeko udalek 2004ean ekin zioten eskualdeko lan munduan euskararen erabilera normalizatzeko sustapena egiteko programari. Helburua zen ahalik eta enpresa gehien martxan jartzea euren euskara plana egiten. 20 enpresa inguru abiatu dira geroztik euskara planetan eta aipatu behar da, horietako batzuk oraindik jarraitzen dutela planaren faseren batean.
Plan hauek burutzen ari diren enpresek Hizkuntza Politika Sailburuordetzako diru laguntzak jasotzeko aukera dute eta horretarako urtero ateratzen den deialdia baliatuz eskaera egiten dute.
Aurtengoan, eskualdean `Lan Hitz´ programaren bidez ematen diren laguntzak adibidez: Autocares Aizpurua (Usurbil), Berriola S. Coop (Usurbil), Galemys S.L. (Hernanin egoitza bat), Latz (Andoain), Orona (Hernani) , S.Izaguirre S.A. (Usurbil), Selectiva San Marcos UTE (Hernani), Telesonic S.A. (Lasarte-Oria) edota Victorio Luzuriaga Usurbil (Usurbil) enpresek jaso dute.
Bestalde, aipatu bezala, 2010etik `Baietz gurean!´ egitasmoa garatzen ari dira Buruntzaldeko udalak, eta lanketa horren ondorioz hainbat dira momentu honetan euskararen erabilera normalizatzeko lanetan ari diren enpresak. Besteak beste, Katealegaia, Sulabe, Adarra, Latz, Horma, Etxeberria, Hostelera del Norte S.L. eta Aldikar autoak S.L.
Hurrengoak hornitzaileak
Lan mundua euskalduntzen jarraitzeko eta herritarrari zerbitzu hobea eskaintzeko helburuarekin, Buruntzaldeko udaletako hornitzaileengana heltzea da jarritako hurrengo erronka. Hornitzaileak aukeratzeko garaian, ahalik eta herri edo udal, gehienetako hornitzaileak izatea baloratuko da baita enpresa gure eskualdean kokatzea besteak beste.
Egun udalek baldintza pleguen bitartez erregulatu dezakete hornitzaileen hizkuntzako betebeharrak baina beti ez da aukera hau egoten kontratazio motaren araberakoa delako.
Hori dela eta, Buruntzaldeko udalen helburua da hornitzaile hauekiko harremana, idatzizkoa be-zala ahozkoa, euskaraz izatea, eta horretarako behar duten laguntza eskaintzea.
Ahalik eta hornitzaile gehienetara iritsita `Baietz gurean!´ egitasmoaren bidez hizkuntza politika egokia ezartzeko laguntzak eskainiko dira dokumentazioa euskaraz jartzeko, errotulazioa euskaratzeko baita lehenengo hitza euskaraz izan dadin beti.